امەريكالىق اسپاز قىمىزدان بالمۇزداق جاساماق
الماتىدا ءوتىپ جاتقان The Good Life دەپ اتالاتىن اسپازدىق فەستيۆالعا الەمنىڭ تۇكپىر-تۇكپىرىنەن اس ازىرلەۋدىڭ اسقان شەبەرلەرى، ءتاتتى تاعامداردىڭ ءتۇر-ءتۇرىن جاسايتىن كونديتەرلەر جينالدى.
بۇلاردىڭ ءارقايسىسى جاڭا تاعامداردىڭ الۋان ءتۇرىن ويلاپ تاپقان ءوز ءىسىنىڭ ماماندارى. سولاردىڭ ىشىندەگى امەريكالىق كونديتەر دەۆيد كەمپبەللدىڭ بۇل ىسپەن اينالىسقانىنا 18 جىل بولىپتى.
وسى ۋاقىتتىڭ ىشىندە ول تالاي فەستيۆالدارعا قاتىسىپ، تالاي ماراپاتتارعا يە بولعان. ءوزى ۇزاق جىلدار لوس-انجەلەستەگى Providence رەستورانىندا قىزمەت ەتكەن. قازىرگى كەزدە دەۆيد كەمبەلل 450 ءنومىرى، 8 اۋتلەتتەرى مەن مەيرامحانالارى بار The Ritz-Carlton قوناقۇيىندە شەف-كونديتەر بولىپ جۇمىس ىستەيدى ەكەن.
امەريكالىق اسپازدىڭ فەستيۆالدا قانداي جۇلدەگە يە بولاتىنىن كىم ءبىلسىن، ءبىراق ول قازاقستاندىقتارعا قازىردەن باستاپ ۇناپ قالدى.
دەۆيد كەمبەلل وسى ۋاقىتقا دەيىن ەلىمىزدەگى بىردە-ءبىر اسپاز-كونديتەردىڭ تۇسىنە دە كىرمەگەن تىڭ ويدى ايتتى. مۇحيتتىڭ ارعى جاعىنان كەلگەن كونديتەر قازاقتىڭ قاسيەتتى سۋسىنى - قىمىزدان بالمۇزداق جاساماقشى ويى بار ەكەنىن ورتاعا سالدى.
بۇل باستامانىڭ يەسى قازاقستانعا كەلگەنىنە ءبىر-ەكى كۇن عانا بولعان وسى دەۆيد كەمبەلل بولىپ قالاتىن شىعار. ول قىمىزدىڭ ءدامىن دە بۇرىن تاتىپ كورمەگەن ەكەن، ءبىراق وعان بىردەن ۇناعان سياقتى. ءسويتىپ، وسى سۋسىننان بالمۇزداق جاساۋ كەرەك ەكەن دەپ شەشىپتى.
دەۆيد كەمبەللدىڭ ءسۇيسىنىپ جەيتىن اسى سالات كورىنەدى، سوندىقتان ول، نەگىزىنەن، ەتتەن جاسالاتىن قازاقتىڭ ۇلتتىق تاعامدارىنا اسا ءتانتى بولا قويماعان سياقتى. فەستيۆالعا باسقا ەلدەردەن كەلگەن ونىڭ ارىپتەستەرى قازاقستانداعى سىردىڭ (ىرىمشىك) چەچيل دەگەن ءتۇرى قاتتى ۇناعانىن ايتقان ەكەن، ءبىراق ونىڭ ۇلتتىق تاعامعا قاتىسى جوق ەكەنىن ەستىگەندە كوڭىلى ورتايىپ قالىپتى.
ءبىراق قازاقتىڭ ۇلتتىق تاعامدارىنىڭ ىشىنەن وزىنە ۇناعان كەيبىر ءمازىردى كىتاپشاسىنا جازىپ نەمەسە جادىنا ساقتاپ امەريكاعا جەتكىزەتىن ويى بار. ەڭ باستىسى، قىمىزدان جاسالعان بالمۇزداقتىڭ رەتسەپتىمەن بولىسسە جاقسى. ەگەر بالمۇزداقتىڭ جاڭا ءتۇرى «قىمىز-بالمۇزداق» پاتەنتتەلىپ، نارىققا شىعىپ جاتسا، ونى Ritz-Carlton جەلىسى ارقىلى ساتىپ الاتىن شىعارمىز.
