وسكەمەندە اقىن ءابىلعازى قايىربەكوۆپەن كەزدەسۋ قىزىقتى ءوتتى - فوتو
اقىننىڭ 10 تومدىعىنا ولەڭدەرى، پوەمالارى، ەسسەلەرى، سونداي-اق ءسابيت مۇقانوۆ، عابيت مۇسىرەپوۆ، بەيىمبەت مايلين جانە باسقا دا جازۋشىلاردىڭ جانە اقىنداردىڭ شىعارماشىلىعى جايلى عىلىمي-زەرتتەۋ ماقالالارى، بەلگىلى مادەنيەت پەن ونەر قايراتكەرلەرىمەن سۇحباتتارى، وچەركتەرى ەنگەن.
قازاقستان جازۋشىلار وداعى وبلىستىق فيليالىنىڭ ديرەكتورى نۇرجان قۋانتاي ءوزىنىڭ قالامداس ۇستازىن 60 جاسقا تولۋىمەن قۇتتىقتاپ، ءداستۇر بويىنشا ونىڭ يىعىنا شاپان جاپتى.
اقىن باقىتجان رايىسوۆا قايىربەكوۆتىڭ ستۋدەنتتىك كەزدەگى شىعارماشىلىعى جونىندە اڭگىمەلەپ، ونىڭ «قاڭباق» دەگەن ولەڭىن وقىپ بەردى.
جازۋشى ءماۋىتقازى زوكەنوۆ جانە ەڭبەك ارداگەرى ماكەن راحيموۆا كىتاپحاناعا تارتقان سىيى ءۇشىن قوناققا وقىرماندار اتىنان العىسىن ايتىپ، شىعارماشىلىق تابىستار تىلەدى. اقىن تىڭداۋشىلاردىڭ سۇراقتارىنا جاۋاپ قايتارىپ، كىتاپحانانىڭ ءوز شىعارمالارىنىڭ ەلەكتروندىق نۇسقاسىن اۆتورلىق قۇقىقتى ساقتاي وتىرىپ، پايدالانۋىنا رۇقسات بەرەتىن شارتقا قول قويدى.
كەزدەسۋ جىلى شىرايلى، دوستىق راۋىشتە ءوتتى جانە اۆتوردىڭ ايتۋىنشا، جاقىندا عانا اياگوز تۇرعىنى مۋزىكا جازعان «سەمەي-وسكەمەن» ولەڭىن وقۋمەن اياقتالدى.
ءادىلعازى قايىربەكوۆ تارباعاتاي اۋدانىنىڭ قوجاگەلدى اۋىلىندا 1955-جىلى دۇنيەگە كەلگەن. 1978-جىلى ءال-فارابي اتىنداعى قازاق ۇلتتىق ۋنيۆەرسيتەتىنىڭ فيلولوگيا فاكۋلتەتىن بىتىرگەن. كوپ جىلدار بويى «لەنينشىل جاس» (قازىرگى «جاس الاش»)، «حالىق كەڭەسى»، «قازاق ەلى» گازەتتەرىنىڭ رەداكتسيالارىندا قىزمەت ىستەدى، 2000-جىلدان بەرى س. مۇقانوۆ پەن ع. مۇسىرەپوۆتىڭ ادەبي-مەموريالدىق كەشەنىنىڭ ديرەكتورى.
