شىمكەنتتىك عالىمدار كەپتىرىلگەن شۇبات ۇنتاعىن شىعاردى

استانا. قازاقپارات-  شىمكەنتتىك عالىمدار شۇباتتى كەپتىرىپ، ونىڭ ساقتالۋ مەرزىمىن ۇزارتۋ ءتاسىلىن ويلاپ تاۋىپتى. وقىمىستىلار تۇيە سۇتىنەن بالقايماق پەن تابلەتكا وندىرگەن.

عالىمدار قىمىراننان جاسالعان ونىمدەردى عارىشكەرلەرگە اۋقات رەتىندە قولدانىپ كورمەك. ويتكەنى شۇبات ادام بويىنداعى قان قىسىمىن رەتتەپ، ءوت جولدارىنىڭ جۇمىسىن جاقسارتادى ەكەن.

سۋعا ارالاسقان قۇرعاق شۇبات ءبىر تاۋلىكتە پايدالى ءونىم بولادى. ءمۇساتىللا توقانوۆتىڭ عىلىمي ورتالىعى شاعىن ءسۇت زاۋىتىنان كەم ەمەس. مۇندا شۇباتتىڭ قۇرامىن زەرتتەپ، دايىن ءونىم شىعاراتىن ارنايى قوندىرعىلارى دا بار.

«تۇيە ءسۇتى ۇزاق ۋاقىت ساقتاۋعا كەلمەيدى. تەز اشيدى. شۇباتتىڭ قۇرامى وزگەرگەن سوڭ، شيپاسى بولماي قالادى ەكەن. سوندىقتان ونى كەپتىرىپ، ءتۇرلى ءونىم جاسار كەزدە باستاپقى تابيعي قالپىن ساقتۋعا تىرىسامىز»، - دەيدى عالىمدار.

ءمۇساتىللا توقانوۆ، عالىم - ءبىز شۇباتتىڭ قۇرامىن تابيعي قالپىندا ساقتاپ قالامىز. وعان كونسەرۆانتتار مەن حيميالىق قوسپالار قوسپايمىز. ءبىز تەك ءسۇتتىڭ قىشقىلدانۋ پروتسەسىن تەجەيمىز. سوندىقتان ءونىمنىڭ ساپاسى ساقتالادى.

 جاڭالىققا جانى قۇمار جاندار قىمىراننان جاسالعان ونىمدەرىن پاتەنتتەپ تە الىپتى. قۇرعاق شۇبات ەكسپورتتاۋعا قولايلى. تابلەتكالاردى ەكى جىلعا دەيىن ساقتاۋعا بولادى. ماماندار تابيعي ونىمدەرىن «ەكسپو-2017» كورمەسىنە ۇسىنباق. قىمىراندى جوعارى تەحنولوگيامەن وڭدەۋ ەل ەكونوميكاسىنا دا كوپ سەپتىگىن تيزىگەدى. «قوسىمشا پايدانى ايتپاعاننىڭ وزىندە بۇل سۋسىننىڭ ۇلت ساۋلىعى ءۇشىن الار ورنى بولەك» ، - دەيدى ونەرتاپقىشتار.

داۋلەتبەك حودجيبەرگەنوۆ، م. اۋەزوۆ اتىنداعى و ق م ۋ عىلىم جانە ءوندىرىس دەپارتامەنتىنىڭ ديرەكتورى - قازىرگى تاڭدا بۇل جوبا كەزەك كۇتپەي قولعا الاتىن ماسەلەنىڭ ءبىرى. ويتكەنى اۋىل شارۋاشىلىعى ونىمدەرىنىڭ ىشىندە ءدال وسى تۇيە ءسۇتى تەرەڭ وڭدەلمەيدى. ساۋىلعان ءسۇت كۇيىنشە تۇتىنادى. تەرەڭ وڭدەۋگە ارنالعان جوبا وتە قاجەت دەپ ويلايمىن.

ەمدىك قاسيەتى مول شۇباتتىڭ ۇلتتىق برەندكە اينالۋى دا عاجاپ ەمەس. ويتكەنى دۇنيەجۇزىلىك دەنساۋلىق ساقتاۋ ۇيىمى ءداستۇرلى سۋسىندى جوعارى باعالاپ وتىر. عالىمدار مەملەكەتتەن تۇيە ءسۇتىن تەرەڭدەپ وڭدەۋ تەحنولوگياسىن جانداندىرۋ باعىتىندا 10 ميلليون تەڭگە كولەمىندە گرانت ۇتىپ الىپتى. ەندى ءوز كۇشتەرىمەن وتاندىق ءونىم شىعارۋدى قولعا الماق.

www.khabar.kz