قىتايدا تاريحي قالالارعا كىرۋگە شەكتەۋ قويىلادى

استانا. قازاقپارات - بەيجىڭدەگى «جابىق قالالارعا» تۋريستەردىڭ كىرىپ-شىعۋىنا شەكتەۋ قويىلدى.

بۇدان بىلاي تاريحي قالالاردى تاۋلىگىنە تەك 80 مىڭ ادام تاماشالاي الادى، دەپ حابارلادى www.24.kz.

مۋزەي باسشىلىعى بۇل قادامعا كونە كەشەننىڭ كەلبەتىن ساقتاپ قالۋ ءۇشىن بارعان. سونىمەن قاتار كەلىپ-كەتۋشى ادامداردىڭ قاۋىپسىزدىگى ءۇشىن قاجەت دەيدى. بەيجىڭدەگى «جابىق قالاعا» جىلىنا 15 ميلليون تۋريست كەلىپ كەتەدى.

بۇل كورسەتكىش وسىمەن ءۇشىنشى جىل قايتالانعالى وتىر. كىرە بەرىستە عانا ەمەس، تاريحي عيماراتتىڭ ءىشى دە ىعى-جىعى. ءتىپتى قىتايلىقتار «كونە كەشەنگە كەلەتىن ساياحاتشىلار سانى پاريجدىڭ لۋۆرىنان، لوندونداعى بريتان مۋزەيىنەن دە كوپ» دەپ ماقتانادى.

رەكوردتىق كورسەتكىش - بىلتىر قازان ايىندا كۇنىنە 180 مىڭ ادام كىرىپ شىققان. ءبىراق مۇنشالىقتى مول ادام تاريحي ەسكەرتكىشتەردىڭ ساقتالۋىنا قاۋىپ توندىرەدى جانە قىزمەت كورسەتۋ ساپاسىنا كەرى اسەر ەتەدى.

- «ەكسكۋرسيا كەزىندە جان-جاعىڭىزدان تەك باسقا ادامداردىڭ باسىن كورە الاسىز. كەڭ سارايدى سۇيسىنە ارالاپ، تاريحي جادىگەرلەردى قاراي المايسىز. ءبىز تۋريستەرگە قىزىقتى اقپارات بەرىپ ۇلگەرمەيمىز. حالىقتىڭ تىم كوپ كەلۋى ۇلكەن ماسەلەگە اينالىپ بارادى»، - دەيدى ەكسكۋرسيا جەتەكشىسى مياو بين.

سوندىقتان مۋزەي باسشىلىعى «جابىق قالاعا» كىرۋدەگى جاڭا تالاپ قىزمەت كورسەتۋ ساپاسىن كوتەرەدى» دەيدى. ەڭ باستىسى، قاۋىپسىزدىك ءۇشىن قاجەت دەپ وتىر.

«جابىق قالا» مۋزەيىنىڭ ديرەكتورى شان تسزيسياننىڭ ايتۋىنشا، بىلتىر ورتاشا ەسەپپەن كۇنىنە 46 مىڭ تۋريست كەلگەن ەكەن. ەكى اي بويى تاۋلىگىنە 80 مىڭ ادام كىرىپ  شىققان. بۇل وتە كوپ. سوندىقتان بۇدان بىلاي شەكتەۋلەر ەنگىزىلىپ وتىر.

مۇندا نەگىزىنەن قىتايدىڭ باسقا وڭىرىنەن كەلۋشىلەر كوپ. ىشكى تۋريزم جاقسى دامىعان. الىس اۋىلداعى قىتايلىقتار تايانانمىن الاڭىن، «جابىق قالانى» كورسەم دەپ جەتكەندەر. دەگەنمەن ولار جاڭا تالاپ ءوزىمىز ءۇشىن جاقسى دەپ قۇپتاپ وتىر. ال الىپساتارلاردىڭ جولىن كەسۋ ءۇشىن بيلەت تەك جەكە ازاماتتىق كۋالىكپەن ساتىلادى. توپ-توپقا بولىنگەن تۋريستەردىڭ جەتەكشىلەرى الدىن الا ينتەرنەتتەن تاپسىرىس بەرمەسە، كاسسادا بيلەت بەرىلمەيدى.