نۇرسۇلتان گىر سپورتىنان ەۋروپا كۋبوگىنىڭ قولا جۇلدەسىن يەلەندى

قىزىلوردا. قازاقپارات - رەسەيدىڭ سانكت-پەتەربور قالاسىندا گىر سپورتىنان ەرەسەكتەر اراسىندا ەۋروپانىڭ اشىق كۋبوگى ءوتتى.

14 مەملەكەتتەن قاتىسقان بايراقتى باسەكەدە قازاقستان سپورتشىلارى 1 التىن، 1 كۇمىس، 2 قولا مەدال ولجالادى. سونىڭ ىشىندە قىزىلوردالىق، حالىقارالىق دارەجەدەگى سپورت شەبەرى نۇرسۇلتان كولدەيەۆ نامىستى قولدان بەرمەي، 68 كەلى سالماق دارەجەسىندە قولا جۇلدەنى يەلەندى.

ول سەرپە كوتەرۋدە 32 كەلى گىر تاسىن 86 رەت، جۇلقا كوتەرۋدە 110 رەت باعىندىرىپ، ناتيجەسىندە 141,5 ۇپاي جينادى. بۇل تۋرالى وبلىستىق دەنە شىنىقتىرۋ جانە سپورت باسقارماسىنىڭ باسپا ءسوز قىزمەتى حابارلادى.

ول بۇعان دەيىن ەكى مارتە الەم چەمپيوناتىنىڭ قولا جۇلدەسىن (2013 ج. رەسەي، 2014 ج. گەرمانيا)، ەۋروپا چەمپيوناتىنىڭ كۇمىس (2014 ج. ەستونيا) جانە الەم كۋبوگىنىڭ قولا جۇلدەسىن (2014 ج. امەريكا) يەلەنگەن.

سىرداريا اۋدانىندا شەبەرلىگىن شىڭداپ جۇرگەن نۇرسۇلتان 8-13- ماۋسىم ارالىعىندا پەتروپاۆلدا بولاتىن قازاقستان چەمپيوناتىنا، ودان كەيىن بولگاريادا وتەتىن ەۋروپا چەمپيوناتىنا دايىندالادى.

اۆتور: ەلۋباي اۋەزوۆ