سيرياداعى داعدارىستى اسكەري كۇشپەن شەشۋ مۇمكىن ەمەس - ە. ىدىرىسوۆ
«قازاقستاننىڭ پايىمىنشا، سيريالىق داعدارىس اسكەري كۇشپەن شەشىلۋى مۇمكىن ەمەس. بۇل احۋالدىڭ تەك بەيبىت، بالاما شەشىمى عانا بار»، - دەدى مينيستر.
وسى ورايدا ول بۇل داعدارىستىڭ اينالاسىندا وتە كوپ كۇشتەر شوعىرلانعانىن، ياعني سيريانىڭ ءوزىنىڭ ىشكى كۇشتەرى جانە سىرتقى مۇددەلەر ءىس- قيمىلدار جاساپ جاتقاندىعىن ءمالىم ەتتى.
«وسى داعدارىستىڭ اينالاسىندا وڭىرلىك جانە جاھاندىق ويىنشىلاردىڭ وتە كوپ كۇشتەرى جينالعان. سوندىقتان دا ءبىرىنشى كەزەكتە كەلىسسوزدەر جولىمەن سيريالىقتاردىڭ وزدەرى بەيبىت شەشىمدى جاساۋى كەرەك دەپ سانايمىز. ولار ەلدەرىنىڭ بەيبىت، ۇزاقمەرزىمدى دامۋىن قامتاماسىز ەتۋى ءۇشىن كەلىسىمگە كەلۋى ايرىقشا ماڭىزدى»، - دەدى ە. ىدىرىسوۆ.
ەستەرىڭىزگە سالا كەتەيىك، وسى اپتانىڭ باسىندا استانادا سيريالىق وپپوزيتسيا وكىلدەرىنىڭ كەلىسسوزدەرى باستالدى. وسىعان دەيىن سيريانىڭ وپپوزيتسيالىق كۇشتەر توبى قازاقستانعا ءوز ەلدەرىندەگى داعدارىستى رەتتەۋ ماسەلەسى بويىنشا كەلىسسوزدەردە ارا اعايىندىق جاساۋ تۋرالى ءوتىنىشىن بىلدىرگەنى بەلگىلى.
اۆتور: رۋسلان عابباسوۆ
