شوۋ-بيزنەس جۇلدىزدارى الماتىلىقتاردى اۆتوبۋسقا وتىرۋعا ۇگىتتەدى

الماتى. قازاقپارات - شوۋ-بيزنەس جۇلدىزدارى الماتىلىقتاردى قوعامدىق كولىكپەن قاتىناۋعا ۇگىتتەدى. بۇگىن ولار قالا كوشەلەرىن اۆتوبۋسپەن ءجۇرىپ ءوتتى.

«باتىستا قوعامدىق كولىكتە، مەترودا كەز-كەلگەن سالانىڭ بەلگىلى تۇلعاسىن كەزدەستىرۋگە بولادى. ال بىزدە ول جۇلدىزدارعا لايىق ەمەس سياقتى كورىنەدى. سونداي تۇسىنىك قالىپتاسقان. مەن ءوزىم ۇنەمى مەترومەن قاتىنايمىن. قوعامدىق كولىككە ارنالعان قوسىمشا جولاقتى ەنگىزگەن سوڭ مەن تەك اۆتوبۋسپەن جۇرەتىن بولامىن. بۇل اۆتوموبيلگە ارنالعان جولدا ساعاتتاپ كەپتەلىستە تۇرعاننان ارتىق»، - دەدى بەلگىلى شوۋمەن، سيرك ءارتىسى مۇرات مۇتىرعانوۆ.

«ازيادا ارۋى» كۇمىس بازاربايەۆا دا ءوزىنىڭ قوعامدىق كولىكتى تاڭدايتىنىن جەتكىزدى.

«گازبەن جۇرەتىن جاڭا اۆتوبۋستار، ۆەلوجولدار، مەترو، ەندى قوسىمشا جولاق قالا تۇرعىندارى ءۇشىن اۆتوبۋسپەن قاتىناۋدىڭ باستى سيمۆولى بولىپ وتىر»، - دەدى ك. بازاربايەۆا.

اكسياعا KeshYou توبى، ءانشى تۋرال قاتىستى.

شوۋ-بيزنەس وكىلدەرىمەن بىرگە اۆتوبۋستا قالالىق قوعامدىق كولىك باسقارماسىنىڭ باسشىسى تالعات ءابدىراحمانوۆ تا ءجۇردى.

وسىعان دەيىن الماتىدا اباي كوشەسىنىڭ بويىندا دوستىق داڭعىلىنان مومىش ۇلى كوشەسىنە دەيىنگى ارالىقتا قوعامدىق كولىككە ارنالعان ارنايى جولاق جاسالاتىنى تۋرالى حابارلاپ ەدىك.

«قازىر جولدى، تۇراق ورنىن بەلگىلەۋ سياقتى دايىندىق جۇمىستارى جاسالىپ جاتىر. وسىنداي جولدار الەمنىڭ كوپتەگەن ەلدەرىندە بار. بۇل اۆتوبۋستىڭ جىلدامدىعىن ساعاتىنا 12 شاقىرىمنان 18 شاقىرىمعا دەيىن ۇزارتۋعا مۇمكىندىك بەرەدى. سوعان ساي اۆتوبۋستار مەن تروللەيبۋستار بەكىتىلگەن گرافيككە ساي قوزعالاتىن بولادى. ءبىر-ءبىرىن قايتالايتىن مارشرۋتتاردىڭ ءبىرازى قىسقارىپ، اۆتوبۋستاردىڭ ءجۇرۋ ۋاقىتىنىڭ الشاقتىعى ازايتىلادى»، - دەدى ول.

سونداي-اق شەنەۋنىك جاڭا جىلدان باستاپ اۆتوبۋستاردا قولما-قول ەسەپتەسۋ جۇيەسى جويىلاتىنىن جەتكىزدى. بۇل قوعامدىق كولىكتەردىڭ جولاۋشى ءۇشىن بايگە ۇيىمداستىرۋىنا، ءوزارا جارىسۋىنا قارسى شارا بولماق.

اۆتور: گۇلميرا عوسمانالي