تۇركيادا «دومبىرا» انىنە تىيىم سالىندى
ويتكەنى ول ءان بىلتىر ەلدەگى پرەزيدەنت سايلاۋىنا بيلىك باسىنداعى ادىلەت جانە دامۋ پارتياسىنىڭ اتىنان قاتىسقان رەجەپ تايىپ ەردوعاننىڭ سايلاۋداعى ۇرانى بولاتىن.
بيىلعى پارلامەنت سايلاۋىنا ۇمىتكەر بوپ تىركەلگەن «دومبىرا» ءانىنىڭ ورىنداۋشىسى، بەلگىلى ءانشى ۋعىر ىشىلاق بۇل ءاندى ۇگىت-ناسيحاتقا پايدالانامىن دەپ، سوڭعى ءبىر اپتادان بەرى ەلدەگى وپپوزيتسيالىق پارتيالاردىڭ سىنىنا ىلىگىپ ءجۇر.
ال ۇلتتىق قوزعالىس پارتياسى ەل پرەزيدەنتى تايىپ ەردوعان ءۇشىن جازىلعان ءاننىڭ شىرقالۋىنا تاباندى تۇردە قارسىلىق ءبىلدىرىپ، ورتالىق سايلاۋ كوميسسياسىنا شاعىم تۇسىرگەن.
وسى وقيعاعا قاتىستى ورتالىق سايلاۋ كوميسسياسىنىڭ مۇشەسى شەرەف مالكوچ: «پرەزيدەنت - مەملەكەتتىڭ بىرلىگى مەن تۇتاستىعىنىڭ كەپىلى. سوندىقتان وعان تيەسىلى بولعان ءاندى ەشقانداي پارتيا ساياسي ماقساتتا پايدالانا المايدى»، - دەگەن شەشىم شىعارىلعاندىعىن حابارلادى.
اۆتورى: ەرجان ءجۇنىس
www.24.kz
