گ. ءابدىقالىقوۆا وتباسىلىق قۇندىلىقتاردى دارىپتەۋدىڭ اقپاراتتىق جۇمىستارىن كۇشەيتۋدى جۇكتەدى

استانا. قازاقپارات - بۇگىن ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ كەزەكتى وتىرىسىندا ق ر مەملەكەتتىك حاتشىسى گۇلشارا ءابدىقالىقوۆا وتباسىلىق جانە ادامگەرشىلىك قۇندىلىقتاردى دارىپتەۋ بويىنشا اقپاراتتىق-ءتۇسىندىرۋ جۇمىستارىن كۇشەيتۋدى تاپسىردى.

جيىن بارىسىندا بالا اسىراپ الۋ مەن پاتروناتتى تاربيەنى جەتىلدىرۋ ماسەلەلەرى قارالدى. بەلگىلى بولعانداي، جۇرگىزىلگەن جۇمىستار بيىلعى ءبىرىنشى توقساندا بالالار ۇيىندەگى 219 بالانى ءوز وتباسىلارىنا قايتارۋعا، سونداي-اق 215 بالانى پاتروناتتى تاربيە بەرۋگە جانە وزگەلەردىڭ اسىراپ الۋىنا مۇمكىندىك بەردى.

گ. ءابدىقالىقوۆا قازاقستان مىڭجىلدىقتىڭ بەسىنشى ماقساتىنا مەرزىمىنەن بۇرىن قول جەتكىزگەنىن، انالار ءولىمىنىڭ دەڭگەيى ءۇش ەسە تومەندەگەنىن اتاپ ءوتتى. وسى ورايدا 1999-جىلى ءتىرى تۋىلعان ءار 1000 بالاعا 55 انا ولىمىنەن كەلسە، 2013-جىلى بۇل كورسەتكىش 12,6 پايىزعا دەيىن ازايدى.

دۇنيەجۇزىلىك ەكونوميكالىق فورۋمنىڭ 2014-جىلعى ەسەبىنە سايكەس، 57 ەلدەن تۇراتىن توپتا ەلدە ا ي ت ۆ ينفەكتسياسىنىڭ تارالۋى بويىنشا قازاقستان تومەن كورسەتكىشپەن، ياعني 0,2 پايىزبەن ءبىرىنشى ورىندى يەلەندى.

ايتا كەتەيىك، وتىرىستا مەملەكەت باسشىسىنىڭ تاپسىرماسى بويىنشا ازىرلەنىپ، ۇكىمەت قابىلداعان وتباسىلىق قاتىناستاردى، مورالدىق-ەتيكالىق جانە رۋحاني-ادامگەرشىلىك قۇندىلىقتاردى نىعايتۋدىڭ 2015-2020-جىلدارعا ارنالعان جالپى ۇلتتىق ءىس-شارالار جوسپارىنىڭ ورىندالۋ بارىسى قارالدى.

اۆتور: رۋسلان عابباسوۆ