حورۆاتيا اسكەري-ونەركاسىپ كەشەنى سالاسىنداعى ىنتىماقتاستىقتا زور الەۋەتكە يە

استانا. قازاقپارات - حورۆاتيا اسكەري-ونەركاسىپ كەشەنى سالاسىنداعى ىنتىماقتاستىقتا زور الەۋەتكە يە.

بۇل تۋرالى بۇگىن قازاقستان-حورۆاتيا بيزنەس فورۋمى اياسىندا «اتامەكەن» ۇ ك پ باسقارماسى ءتوراعاسىنىڭ ورىنباسارى راقىم وشاقبايەۆ ايتتى.

«حورۆاتيانىڭ تۋريزمنەن بولەك اسكەري-ونەركاسىپ كەشەنى سالاسىنداعى ىنتىماقتاستىقتا ءبىرشاما الەۋەتكە يە. اسىرەسە، قارۋ-جاراق سالاسىندا حورۆاتيا ەرۋوپالىق وداق ەلدەرىنە تانىمال. سوندىقتان، بۇل دا ماشينا جاساۋ سالاسىنداعى ىنتىماقتاستىعىمىز ءۇشىن قىزىقتى»، - دەدى ول.

ونىڭ اتاپ وتۋىنشە، قازاقستان تارابى بولسا حورۆاتياعا اۋىل شارۋاشىلىعى شيكىزاتى مەن ونىڭ وڭدەلگەن ونىمدەرىن جەتكىزە الادى.

«بىزدەر ءۇشىن حورۆاتيانىڭ تۋريستىك قىزمەتتى جۇزەگە اسىرۋداعى تاجىريبەسى دە قىزىقتى. ويتكەنى، حورۆاتيا تۋريستەر ءۇشىن تانىمال ورتالىقتاردىڭ ءبىرى بولىپ وتىر»، - دەدى ر. وشاقبايەۆ.

اۆتور: مارلان جيەمباي