قازاقستان-حورۆاتيا ىسكەرلىك كەڭەسى قۇرىلادى

استانا. قازاقپارات - قازاقستان-حورۆاتيا ىسكەرلىك كەڭەسى قۇرىلادى. سايكەسىنشە كەلىسىمگە بۇگىن قازاقستان-حورۆاتيا بيزنەس فورۋمى اياسىندا قول قويىلدى.

قۇجاتتى «اتامەكەن» ۇ ك پ باسقارماسى ءتوراعاسىنىڭ ورىنباسارى راقىم وشاقبايەۆ پەن حورۆاتيا شارۋاشىلىق پالاتاسىنىڭ پرەزيدەنتى لۋك بۋريلوۆيچ راسىمدەدى.

كەڭەس ەكى ەلدىڭ كاسىپكەرلەرى اراسىنداعى ساۋدا ينۆەستيتسيالار، تەحنولوگيالار بەرۋ، قىزمەتتەر كورسەتۋ جانە ونەركاسىپتىڭ باسقا دا سالالارىنداعى ىنتىماقتاستىقتى ورىستەتۋگە مۇمكىندىك بەرەدى. سونىمەن قاتار قازاقستان مەن حورۆاتيا اراسىنداعى ەكىجاقتى ەكونوميكالىق بايلانىستاردىڭ ارتا تۇسۋىنە ءوز سەپتىگىن تيگىزەتىن بولادى.

فورۋمعا حورۆاتيا تارابىنان 80 گە جۋىق، ال قازاقستان تارابىنان 200 گە جۋىق كاسىپكەر قاتىسۋدا. شارانىڭ اشىلۋ راسىمىنە ەكى ەلدىڭ ۇكىمەت باسشىلارى كارىم ءماسىموۆ پەن زوران ميلانوۆيچ ارنايى قاتىسىپ، ءسوز سويلەدى.

ايتا كەتەيىك، 2005-2014- جىلدارى ارالىعىندا حورۆاتيا ەلىمىزگە 6,4 ميلليون دوللار كولەمىندە تىكەلەي ينۆەستيتسيا سالدى. ال ءدال وسى ارالىقتاعى قازاقستاننىڭ حورۆاتياعا قۇيعان تىكەلەي ينۆەستيتسياسىنىڭ كولەمى 0,3 ميلليون دوللارعا تەڭ.

اۆتور: مارلان جيەمباي