جامبىل وبلىسىندا قىمىزبەن ەمدەۋ مەكەمەسى اشىلادى

 تاراز. قازاقپارات - جامبىل وبلىسىنىڭ ت. رىسقۇلوۆ اۋدانىندا «شاۋشەن» شارۋا قوجالىعى بار. وسى شارۋا قوجالىعىنىڭ باسشىسى سايرامباي دونەنبايەۆ ىنىلەرى مەيرامبەك جانە قاليمەن بىرلەسىپ قازاقستانداعى ءىرى مال شارۋاشىلىعىنىڭ ءبىرىن باسقارىپ وتىر. مۇندا مىڭ باس ەدىلباي قويى، جۇزدەگەن وگىز، قازاقى تۇقىمدى جىلقى مالى بار.

بۇدان وزگە، شارۋا قوجالىعىنىڭ ءوز جايىلىمى، ءشوپ شابىندىعى مەن ەگىستىگى بار، سونىڭ ارقاسىندا مۇنداعى مال ءوز جەم- شوبىمەن قامتىلادى.

س. دونەنبايەۆ جامبىل وبلىسى بويىنشا العاشقى بولىپ ەلوردالىق ساۋدا ورتالىقتارىنا ەت ونىمدەرىنىڭ اۋقىمدى كولەمىن جەتكىزدى.

شارۋا قوجالىعى باسشىسىنىڭ ايتۋىنشا، 2014 - جىلى قىمىز ءوندىرۋ ءۇشىن ءوز قاراجاتتارىنا قۇنى 250 ميلليون تەڭگە تۇراتىن جىلقى فەرماسى جوباسىن ىسكە قوسقان. بۇگىنگى تاڭدا مۇندا ءار بيەدەن 9 ليترگە دەيىن ساۋمال ساۋىلادى. قوجالىق قويماسىندا 16 مىڭ ليتر قىمىز ساقتاۋلى.

«تاۋ ەتەگىندە قىمىزبەن ەمدەيتىن ورىن قۇرىلىسىن جۇرگىزىپ جاتىرمىز، - دەيدى س. دونەنبايەۆ. - «بيزنەستىڭ جول كارتاسى-2020» مەملەكەتتىك باعدارلاماسى بويىنشا قولداۋ الۋدى جوسپارلاپ وتىرمىز، ويتكەنى قىمىزبەن ەمدەۋ ورنىنا دەيىن 5,5 شاقىرىم جولعا اسفالت توسەۋ قاجەت».

مەيرامبەك دونەنبايەۆتىڭ ويىنشا، حالىق اراسىندا تارالعان ادىسپەن ازىرلەنگەن قىمىز مەحانيكالاندىرىلعان جابدىقتا دايىندالعان سۋسىننان گورى دامدىرەك، ءارى ونىڭ ەمدىك قاسيەتى دە كۇشتىرەك.

ايتا كەتەيىك، اعايىندى دونەنبايەۆتار رىسقۇلوۆ اۋدانىنىڭ تىنىس- تىرشىلىگىنە بەلسەندى تۇردە اتسالىسۋدا. مەملەكەت باسشىسىنىڭ بيزنەستىڭ الەۋمەتتىك جاۋاپكەرشىلىگى تۋرالى ايتقانىن ەسكەرە وتىرىپ، كاسىپكەرلەر جەڭىستىڭ 70 جىلدىعىنا وراي ءوز قاراجاتتارىنا تۋعان اۋىلدارى جارلىسۋدا ماڭگىلىك الاۋ ورناتتى، ونىڭ ماڭىنداعى الاڭدى اباتتاندىردى. ال بۇعان دەيىن، 2012 - جىلى مەشىت پەن بالالار ينتەرناتىن سالىپ بەرگەن ەدى.