ەلباسى بارلىق تاراپتاردى ۋكراينا اينالاسىنداعى احۋالدى تەزدەتىپ شەشۋگە شاقىردى
«ەكونوميكا ءارقاشان دا بەيبىتشىلىككە الىپ كەلەدى. ەگەر مەملەكەت كورشىلەس ەلدەرمەن ساۋدا- ساتتىقتى جۇرگىزىپ، ۇلكەن تاۋار اينالىمعا قول جەتكىزسە، بۇل تۇرعىدا وسى ۇدەرىستەگى ەلدەر كورشىسىنىڭ جاعدايى جاقسى بولعانىن قالايدى»، - دەدى ەلباسى.
ن. نازاربايەۆ قازىرگى كەزدەگى سانكسيالاردى رەسەي ەڭسەرۋگە قاۋقارلى ەكەنىن، ر ف ۇلكەن رەسۋرستارى بار اۋقىمدى مەملەكەت ەكەنىن، الەم ەلدەرى رەسەيدىڭ پىكىرىمەن ەسەپتەسۋ كەرەكتىگىن، سونداي- اق رەسەي دەرجاۆا رەتىندە وسى اتاۋعا لايىقتى بولۋى ءتيىس ەكەنىن اتاپ ءوتتى.
الەمدە بولىپ جاتقان پروبلەمالاردى شەشۋدەگى ىستەرگە، بارشا الەمدە بەيبىتشىلىكتى ورناتۋ ۇردىسىنە قاتىسۋ ماڭىزدى دەپ توقتالعان مەملەكەت باسشىسى: «بۇل تۇرعىدا رەسەيدىڭ ءرولى باعا جەتپەس جانە ونى الەم ەلدەرى ءتۇسىنۋى كەرەك. وسى داعدارىستان رەسەي تەزىرەك شىعۋعا نيەتتى جانە مەن دە وعان تىلەكتەسپىن. ۋكراينا دا بۇل داعدارىستى ەڭسەرۋى قاجەت» ، - دەدى.
وسى ورايدا ن. نازاربايەۆ ۋكراينا احۋالى جاقىن ارادا شەشىلۋى قاجەت ەكەنىن ايتا كەلە: «بارلىق تاراپتاردى بۇل پروبلەمانى شەشۋدە ۋاعدالاستىققا كەلىپ، حالىقتارىمىزدىڭ يگىلىگى ءۇشىن ارى قاراي جىلجۋعا شاقىرامىن»، - دەپ اتاپ ءوتتى.
اۆتور: رۋسلان عابباسوۆ
