ەلىمىز شەت مەملەكەتتەن جەتكىزىلەتىن ءدارى- دارمەكتى نارىقتان بىرتىندەپ ىعىستىرىپ، وتاندىق ونىمگە باسىمدىق بەرمەك
بۇگىن «جەرگىلىكتى قامتۋدى دامىتۋدىڭ ۇلتتىق اگەنتتىگى» مەن «فيتوحيميا» وندىرىستىك حولدينگى اراسىندا ءوزارا ىنتىماقتاستىق جونىندەگى كەلىسىمشارتقا قول قويىلدى.
وسىلايشا ەلىمىزگە شەت مەملەكەتتەن جەتكىزىلەتىن ءدارى- دارمەك نارىقتان بىرتىندەپ ىعىستىرىلىپ، وتاندىق ونىمگە باسىمدىق بەرىلمەك. وكىنىشكە وراي، قازىر ەلىمىزدىڭ ءدارى- دارمەك نارىعىنداعى وتاندىق ءونىمنىڭ ۇلەس سالماعى %20- دان اسپايدى. ەلباسى الداعى 2-3 جىلدا بۇل كورسەتكىشتى % 50- عا جەتكىزۋدى قاداپ تاپسىردى. ول ءۇشىن 5 فارماتسيەۆتيكالىق زاۋىت سالىنىپ، 16 كاسىپورىن كۇردەلى جوندەۋدەن وتپەك. ءبىراق بۇل جەتكىلىكسىز. ەڭ اۋەلى وتاندىق ءدارى- دارمەكتىڭ ساپاسىن ارتتىرىپ، تۇتىنۋشىلاردىڭ سۇرانىسىن قاناعاتتاندىرۋ قاجەت.
قايسار امانبايەۆ، «جەرگىلىكتى قامتۋدى دامىتۋدىڭ ۇلتتىق اگەنتتىگى NADLoC» ا ق باسقارما باسشىسىنىڭ ورىنباسارى:
- ءبىزدىڭ ماقساتىمىز - تۇتىنۋشىلاردىڭ بويىنداعى پاتريوتتىق سەزىمدى وياتۋ، وتاندىق ونىمگە دەگەن سۇرانىستى ارتتىرۋ. وكىنىشكە وراي، قازىر بىزدە سىرتتان كەلەتىن تاۋارلاردى جارنامالاۋ باسىم، وتاندىق ءونىم ۇنەمى كەنجە قالىپ جاتادى. وسى ولقىلىقتىڭ ورنىن تولتىرساق دەيمىز. ونەركاسىپتىڭ بارلىق سالاسىن قامتۋ جوسپارىمىزدا.
قازىر قاراعاندىداعى فارماتسيەۆتيكالىق زاۋىتتا ءدارى- دارمەكتىڭ 72 ءتۇرى وندىرىلەدى، 12 عىلىمي زەرتحاناسى بار. شيكىزاتتىڭ بارلىعى وزىمىزدە وسەتىندىكتەن، قازاقستاندىق ۇلەس % 100- دى قۇرايدى. ەندى تەك مەملەكەتتىك تاپسىرىس كەزىندە وتاندىق ونىمگە باسىمدىق بەرىلسە، ونەركاسىپ اۋقىمى كەڭەيەر ەدى، - دەيدى حولدينگ باسشىسى سەرعازى ادەكەنوۆ.
سەرعازى ادەكەنوۆ، «فيتوحيميا» وندىرىستىك حولدينگىنىڭ پرەزيدەنتى:
- قازاقستاندىق دارىلەردى حالىقارالىق ستاندارتقا سايكەس شىعارىپ، اۋرۋحانالارعا، ءدارىحانالارعا بەرىپ جاتىرمىز. وسى ونىمدەرىمىز قول قويىلعان مەموراندۋم توڭىرەگىندە ۇلعايتىلادى. سونىمەن قاتار يمپورت ارقىلى الىنىپ جاتقان دارىلەردى ىعىستىرىپ، الماستىرىپ، ءوزىمىزدىڭ بىرەگەي قازاقستاندىق دارىلەر ورنىن باسادى.
قازىر قاراعاندىداعى فارماتسيەۆتيكا زاۋىتىندا جاسالاتىن «ارگلابين» ءدارىسى الەمنىڭ 6 مەملەكەتىنە ەكسپورتتالادى. قاتەرلى ىسىكتى ەمدەۋگە ارنالعان پرەپارات قازاقستاندا عانا وسەتىن جۋسان وسىمدىگىنەن جاسالعان. ەندى ءدارىحانا سورەلەرىندە وسىنداي وتاندىق ونىمدەرىمىزگە باسىمدىق بەرىلسە، ساپاسىنا باقىلاۋ كۇشەيىپ، باعاسى دا ارزاندار ەدى، - دەيدى ماماندار.
