سىعاندار يتاليا تۇرعىندارىنىڭ مازاسىن قاشىردى
ولارمەن شىنداپ كۇرەسۋگە بەل بايلاعان تۇرعىندار سىعاندار قالاشىعىن الىپ تاستاۋدى تالاپ ەتىپ، قول جيناۋعا كىرىستى. سىعاندار لاگەرى ريمنىڭ شەتكى اۋدانىنا كورشىلەس ورنالاسقان. تۇرعىندار ءۇي- جايىن قاراۋسىز قالدىرۋعا قورقادى. باعالى زاتتاردى پاتەردە ساقتامايدى. ءتىپتى بالالارىن دا كوشەگە شىعارۋدان قالعان. سوندىقتان سىعاندار توبىرىنا قارسى شىعۋ شاراسىنا بەلسەندى تۇردە قاتىسۋدا.
ەمانۋەلە بۋففولانو، ازاماتتىق قورعانىس ەرىكتىلەرى قاۋىمداستىعىنىڭ وكىلى:
- سىعاندار لاگەرىنە قارسىلىق تانىتقان حالىقتىڭ قاراسى كوپ. ءبىز قالا بويىنشا 5 مىڭعا جۋىق قول جينايمىز دەپ جوسپارلاپ وتىرمىز. سوسىن ونى اكىمگە جولدايمىز. ويتكەنى تۇرعىنداردىڭ ءتوزىمى تاۋسىلدى.
قالا بيلىگى سىعاندار قالاشىعىن قۇرۋدى وسىدان 20 جىل بۇرىن قولعا العان. ونداعى ماقسات كەلىمسەكتەردى ورتالىقتان الشاقتاتۋ بولاتىن. بۇگىندە ولار كۇيمەلەردە كۇي كەشىپ، قوقىس جاشىكتەرىن اقتارىپ- توڭكەرۋدەن قولدارى بوسامايدى.
دجۋزەپپە دجوردجيوللي، شەرۋگە قاتىسۋشى:
- ولار قوقىستى جيناپ، لاگەرگە اپارادى. سوسىن ودان تەمىر نەمەسە مىس الۋ ءۇشىن ورتەيدى. اينالا قارا تۇتىنگە ورانادى. ال ءبىز لاس اۋامەن دەمالۋعا ءماجبۇرمىز. نەگىزىنەن وعان زاڭمەن تىيىم سالىنعان. ءبىراق ونى قاداعالاپ جاتقان ەشكىم جوق.
رەسمي تىركەلگەن 8 لاگەرگە جىل سايىن بيۋدجەتتەن 24 ميلليون ەۋرو جۇمسالادى. ياعني ايىنا جان باسىنا 450 ەۋرودان اينالادى. بۇل قارجىعا قالاداعى تاستاندى ۇيلەردى قالپىنا كەلتىرىپ، سەندەلىپ جۇرگەن سىعانداردى ورنالاستىرۋعا بولادى دەيدى تۇرعىندار. ءبىراق بيلىك بۇل ماسەلەدە بەلسەندىلىك تانىتار ەمەس. ەسەسىنە وپپوزيتسيا قولايلى ءساتتى قالت جىبەرمەي، وتقا ماي قۇيۋدا.
ماتتەو سالۆيني، وپپوزيتسيالىق پارتيانىڭ باسشىسى:
- يتاليادا سىعان قالاشىعىنا ورىن جوق. 3 ايدان كەيىن بۇل جەردى بوساتۋعا دايىن بولىڭىزدار. سىزدەرگە الدىن الا ەسكەرتىپ جاتىرمىز. تۋرا 3 ايدان كەيىن بۋلدوزەر كەلىپ اۋماقتى سۇرەتىن بولادى. پاتەر ساتىپ الاسىزدار ما نەمەسە جالدايسىزدار ما وندا ءبىزدىڭ شارۋامىز جوق. ەندى يتاليالىقتاردىڭ ەسەبىنەن كۇن كورمەيسىزدەر.
كۇرمەۋلى ماسەلە ەۋروپانىڭ وزگە دە ەلدەرىن الاڭداتىپ وتىر. الايدا بۇل جاعدايدا يسپانيا كوپشىلىككە ۇلگى بولۋدا. اتالعان مەملەكەتتە 800 مىڭ سىعان بار ەكەن. ءبىراق ولار وقشاۋلانعان قالاشىقتاردا ەمەس، كوپشىلىكپەن بىرگە پاتەردە ءومىر سۇرەدى. يتاليانىڭ كەيبىر قالالارى دا تۇيىتكىلدىڭ ءتۇيىنىن ءدال وسىلاي تارقاتقان. ال ەل استاناسى پروبلەمانى وڭتايلى شەشە الماي وتىر. شەنەۋنىكتەردىڭ شيكىلىگى الەۋمەتتىك شيەلەنىسكە سوقتىرۋى مۇمكىن دەيدى ماماندار.
