جاھاندىق جىلىنۋ سالدارىنان الماتى وبلىسىنداعى بارلىق مۇزدىقتار ەرۋى مۇمكىن - ۆ. بوجكو
بۇل تۋرالى بۇگىن و ك ق بريفينگىندە ق ر ىشكى ىستەر ءمينيسترىنىڭ ورىنباسارى ۆلاديمير بوجكو ايتتى.
«الەمدىك دارەجەدەگى «McKenzie» كونسۋلتاتسيالىق كومپانياسىنىڭ بولجامى بويىنشا، 2050 - جىلعا قاراي جاھاندىق جىلىنۋ سالدارىنان الماتى وبلىسىنداعى بارلىق مۇزداقتار ەرۋى مۇمكىن. بۇگىننىڭ وزىندە الماتى مۇزداقتارىنىڭ كوبەسى سوگىلىپ، ازداپ ەرىپ جاتىر. ناقتىراق ايتساق، كولەمى بويىنشا % 1- دىق جانە اۋدانى بويىنشا %0,5- دىق جىلدامدىقپەن ەرۋدە. ەندى مۇنداي قارقىنمەن بارلىق مۇزدىق قانشا ۋاقىتتا ەرىپ بىتەتىنىن وزدەرىڭىز ەسەپتەي بەرىڭىزدەر»، - دەدى ۆ. بوجكو.
ونىڭ ايتۋىنشا، بۇل جاھاندىق ماسەلەنى شەشۋدە بۇكىل الەم بولىپ جۇمىلۋ قاجەت.
«جاھاندىق جىلىنۋ دەگەن وتە ۇلكەن قاتەر. مەن ب ۇ ۇ باستاماسىمەن جاپونيادا وتكەن كليماتتىڭ وزگەرۋىنە بايلانىستى بۇكىل الەمدىك كونگەرسكە باردىم. سوندا مۇحيتتىق ارالدارداعى ەلدەر وكىلدەرىنىڭ ايتۋىنشا، انتاركتيدا مەن سولتۇستىك مۇزدى مۇحيتتىڭ مۇزدارى ەرىسە، ولاردىڭ مەملەكەتتەرى دە سۋ تۇبىنە كەتۋى عاجاپ ەمەس. ويتكەنى، ولار تەڭىز دەڭگەيىنەن نەبارى 1-2 مەتر عانا جوعارى. سوندىقتان دە بۇكىل الەم بولىپ شۇعىل شارالار قابىلداماساق، ول قاتەر بىزگە دە تونەدى»، - دەدى ۆ. بوجكو.
