استاناداعى نوبەل اكادەمياسى وكىلدىگى قازاقستاندىقتارعا ۇلى بريتانيادا تەگىن ءبىلىم الۋعا جول اشادى

استانا. قازاقپارات - قازاقستاندىق تۇلەكتەر ەندى ۇلى بريتانيادا تەگىن جوعارى ءبىلىم الا الادى.

ەلوردادا نوبەل اكادەمياسىنىڭ وكىلدىگىن اشۋدىڭ ارقاسىندا ەلىمىزدىڭ ۇزدىك وقۋشىلارى بيىل نوبەل اكادەمياسى ءبولىپ وتىرعان 5 گرانت ءۇشىن ءبىلىم باسەكەسىنە تۇسە الادى.

تۇلەكتەر ماۋسىم ايىندا A Levels باعدارلاماسى بويىنشا ەمتيحان تاپسىراتىن بولادى، دەپ حابارلايدى astana.kz.

- قازاقستان مەملەكەتىنىڭ نوبەل وتباسىمەن تاريحي ىنتىماقتاستىعىن ەسكەرە وتىرىپ، استانا قالاسىندا اكادەميا اشۋدى ءجون سانادىق. مۇنداي وكىلدىكتەردى الماتى، اتىراۋ جانە قازاقستاننىڭ باسقا دا قالالارىندا اشۋ جوسپارلانعان. ورتالىقتا ۇزدىك وقىعان ستۋدەنتتەر ەكى ديپلومعا - ۇلى بريتانيا مەن شۆەيتساريا ديپلومدارىنا يە بولادى. ەڭ ۇزدىك وقىعاندارى الەمنىڭ كەز-كەلگەن ۋنيۆەرسيتەتىندە ءوز ءبىلىمىن جالعاستىرۋعا مۇمكىندىك الادى، - دەيدى Nobel International Fraternity Academy ءتوراعاسى فيليپ نوبەل.

ءبىرىنشى كەزەكتە، جاڭا ورتالىقتا تۇلەكتەر اعىلشىن ءتىلىن جەتىك مەڭگەرگەندەرىن كورسەتۋلەرى كەرەك. ولاردىڭ ەڭ ۇزدىكتەرى ۇلى بريتانيادا تەگىن وقۋ مۇمكىندىگىنە يە بولادى. بۇل جەردە مەكتەپ تۇلەكتەرىمەن قاتار ديپلومدى ماماندار دا ەكونوميكا، بيزنەس جانە زاڭ سالالارىنداعى ماماندىقتار بويىنشا ءبىلىم الا الادى.