باتىس قازاقستاندىق ا. سميرنوۆ ارالاس جەكپە-جەكتەن ازيا چەمپيونى اتاندى

ورال. قازاقپارات - تاجىكستاننىڭ حۋدجاند قالاسىندا ارالاس جەكپە-جەكتەن وتكەن ازيا چەمپيوناتىندا باتىس قازاقستاندىقتار اندرەي سميرنوۆ التىن، اسلانبەك تاجەنوۆ قولا مەدالدى جەڭىپ الدى.

ب ق و دەنە شىنىقتىرۋ جانە سپورت باسقارماسىنان تۇسكەن مالىمەتكە قاراعاندا، اتالعان جارىسقا ازيانىڭ سەگىز ەلىنەن سپورتشىلار قاتىستى. ب ق و ىشكى ىستەر دەپارتامەنتىنىڭ قىزمەتكەرى، پوليتسيا كاپيتانى ا. سميرنوۆ 93 كەلى سالماقتا ۇزدىك اتانسا، ا. تاجەنوۆ 70,3 كەلىدە ءۇشىنشى ورىندى يەلەندى.

ايتا كەتەيىك، بۇل جارىستا قازاقستان قۇراماسى جالپى كوماندالىق ەسەپتە جەڭىس تۇعىرىنا كوتەرىلدى. ا. سميرنوۆتان باسقا قاراعاندىلىق كيريلل ليتۆينەنكو (61,2 كەلى)، اقتوبەلىك گويتي دازايەۆ (77,1 كەلى)، اتىراۋلىق جاسۇلان حاسيموۆ (84 كەلى) التىننان القا تاقسا، تاعى ءبىر قاراعاندىلىق التىنبەك باجيموۆ (84 كەلى) كۇمىس جۇلدەنى جەڭىپ الدى.

حۋدجاندتا سونىمەن قاتار «كوشپەلىلەر شايقاسى-4» حالىقارالىق كاسىبي تۋرنير دە وتكىزىلدى. مۇندا تاعى ءبىر باتىس قازاقستاندىق ەركىنبەك ينجەل 84 كەلى سالماقتا جەڭىمپاز اتاندى.