تۇركيانىڭ ادانا قالاسىندا ن. نازاربايەۆ اتىنداعى داڭعىل اشىلدى - فوتو

استانا. قازاقپارات - جەرورتا تەڭىزىنىڭ توڭىرەگىندە ورنالاسقان ادانا قالاسىندا قازاقستاننىڭ تۇڭعىش پرەزيدەنتى ن. ءا. نازاربايەۆ اتىنداعى داڭعىلدىڭ اشىلۋ سالتاناتى ءوتتى.

بۇل تۋرالى تۇركياداعى ق ر ەلشىلىگىنەن حابارلادى.

ادانا ونەركاسىپتىك جانە اۋىل شارۋاشىلىق ينفراقۇرىلىمى دامىعان تۇركيانىڭ حالقى سانى بويىنشا التىنشى قالاسى بولىپ تابىلادى (2,2 ميلليون ادام). قالادا ەلدىڭ ەڭ ءىرى يندۋستريالىق ايماقتارىنىڭ ءبىرى ورنالاسقان. ادانانىڭ تاريحى ب. ز. 9- عاسىرىنان باستاۋ الىپ، ءار ءتۇرلى زاماندا ريم، ۆيزانتيا جانە وسمان يمپەريالارىنىڭ قۇرامىنا ەنگەن بولاتىن. قالانىڭ ورنالاسقان جەرى چۋكۋروۆا القابى ماڭىزدى اۋىل شارۋاشىلىق ايماعى بولىپ، سول جەرلەردە ماقتا، ءبيداي، ارپا، ءجۇزىم، ءزايتۇن، تەمەكى جانە باسقالارى وسىرىلەدى. ونىڭ جىلدىق تابىسى 30 ميلليارد دوللار شاماسىندا.

قالا ءىرى داڭعىلدارىنىڭ بىرىنە ن. ءا. نازاربايەۆتىڭ اتىن بەرۋ تۋرالى شەشىم ادانا ايماعى ءماسليحاتىنىڭ قازاقستاننىڭ تۇڭعىش پرەزيدەنتىنىڭ قۇرمەتىنە وتكىزىلگەن وتىرىسى بارىسىندا قابىلداندى.

داڭعىل قالا ورتالىعىنداعى ادانانىڭ ەڭ كونە كوللەدجى تۇرعان جەردە ورنالاسقان.

اشىلۋ سالتاناتى بارىسىندا ادانانىڭ گۋبەرناتورى مۇستافا بۇيۋك پەن ءمەرى حۇسەيىن ءسوزليۋ قازاقستان ەكونوميكاسىنىڭ ىرعاقتى دامۋىن، سونداي-اق تۇڭعىش پرەزيدەنت ن. ءا. نازاربايەۆتىڭ باسشىلىعىنداعى ەلىمىزدىڭ جەتىستىكتەرىن جوعارى باعالادى. م. بۇيۋك پەن ح. سوزليۋ قازاقستان ەلباسىنىڭ قازاق-تۇرىك قارىم-قاتىناسى مەن تۇركى ينتەگراتسياسى توڭىرەگىندەگى زور ۇلەسىن اتاپ ءوتتى. ادانا قالاسىنىڭ ورتالىق داڭعىلدارىنىڭ بىرىنە الەمدىك دەڭگەيدە بەدەلدى تۇركى الەمىنىڭ اقساقالى قازاقستاننىڭ تۇڭعىش پرەزيدەنتىنىڭ ەسىمىن بەرۋ ماسەلەسى قالا ءۇشىن اسا قۇرمەت بولىپ تابىلادى.

«قازاقستان پرەزيدەنتى ن. ءا. نازاربايەۆ حالىقارالىق دەڭگەيدەگى اتاقتى تۇلعا بولىپ تابىلادى، ال ەلىنىڭ بولاشاق دامۋى جونىندەگى ستراتەگيالارىنىڭ تۇركيانىڭ نەگىزىن قالاۋشى مۇستافا كەمال اتاتۇرىكتىڭ كوزقاراستارىمەن سايكەستىگىن اڭعارۋعا بولادى. قازاقستاننىڭ الەمنىڭ كوپتەگەن مەملەكەتتەرى ءۇشىن وركەندەۋ، بەيبىتشىلىك پەن تۇراقتىلىقتىڭ سيمۆولى ەكەندىگىن ايتا كەتكىم كەلەدى»، - دەپ ءمالىم ەتتى گۋبەرناتور م. بۇيۋك.

ءوز كەزەگىندە ەلشى ج. تۇيمەبايەۆ پروۆينتسيا باسشىلىعى مەن قالا تۇرعىندارىنا ق ر پرەزيدەنتى ن. ءا. نازاربايەۆتىڭ تۇلعاسى ارقىلى قازاقستان حالقىنا بىلدىرىلگەن سىي-قۇرمەتى ءۇشىن ريزاشىلىعىن ءبىلدىردى.