مەكتەپ فورماسىنىڭ وتاندىق ءوندىرىسى ينستيتۋتىن قۇرۋ ماسەلەسىن قاراستىرۋ كەرەك - ءا. يسەكەشيەۆ
بۇل تۋرالى بۇگىن ق ر پارلامەنتى ماجىلىسىندەگى ۇكىمەت ساعاتىندا ق ر ينۆەستيتسيالار جانە دامۋ ءمينيسترى اسەت يسەكەشيەۆ ءمالىم ەتتى.
«مەكتەپ فورماسىمەن قامتاماسىز ەتۋ ساپاسى ەرەكشە الاڭداۋشىلىق تۋىنداتىپ وتىر. وتاندىق وندىرۋشىلەر بارلىق وقۋشىلاردى مەكتەپ فورماسىمەن قامتاماسىز ەتۋگە جانە جەرگىلىكتى بيۋدجەتكە سالىق تۇسىمدەرىن ارتتىرۋعا قاۋقارلى بولعانىمەن تەندەردى ۇتىپ الۋشىلار نەگىزىنەن تاپسىرىستى قىتايعا نەمەسە تۇركياعا بەرەدى»، - دەدى ول.
ءمينيستردىڭ اتاپ وتۋىنشە، ەلىمىزدە ءبىرجىلدىق مەكتەپ فورماسى نارىعىنىڭ كولەمى 30,0 ميلليارد تەڭگەدەن اسىپ جىعىلادى ەكەن. ال مەكتەپ فورماسىن دايىنداۋ ءۇشىن تەندەردى ۇتىپ الۋشىلار تاپسىرىستى شەتەلگە بەرەتىندىكتەن جىل سايىن قازاقستان قازىناسىنا قوسىلعان قۇن سالىعى تۇرىندەگى 4 ميلليارد تەڭگەدەن استام سوما تۇسپەي قالىپ وتىر.
«وسى سەبەپتى مەكتەپ فورماسىنىڭ وتاندىق ءوندىرىسى ينستيتۋتىن قۇرۋ ماسەلەسىن قاراستىرۋ قاجەت»، - دەدى ءا. يسەكەشيەۆ.
اۆتور: مارلان جيەمباي
