رەسپۋبليكالىق سپورت مەديتسيناسى ورتالىعى الماتىدان استاناعا كوشىرىلمەك

استانا. قازاقپارات - الماتىداعى سپورت مەديتسيناسى ورتالىعى استاناعا قونىس اۋدارادى.

بۇل تۋرالى بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.

«دامىعان سپورتتىق مەديتسينا ۇلكەن دودالاردا ءساتتى ونەر كورسەتۋدىڭ ماڭىزدى قۇرامداسى بولىپ تابىلادى. شىنىن ايتقاندا، قازاقستاندا سپورتتىق مەديتسينا جوعارى دەڭگەيدە ەمەس. قازىرگى كەزدە مينيسترلىك بۇل ۇدەرىستەگى شارالاردى قولعا الدى»، - دەدى مينيستر.

ونىڭ سوزىنە قاراعاندا، وسى جۇمىستىڭ اياسىندا الماتىداعى مەديتسينالىق دايارلىق ورتالىعىن استاناعا كوشىرۋ قاراستىرىلىپ جاتىر.

«سەبەبى، بارلىق ماڭىزدى وقيعالار ەلوردادا وتەدى. قازىرگى كەزدە ءبىلىم جانە عىلىم مينيسترلىگى جەلىسى بويىنشا سپورتتىق مەديتسينا ماماندارىن دايارلاۋعا قارجى بولىنۋدە»، - دەدى ا. مۇحامەدي ۇلى.

اۆتور: رۋسلان عابباسوۆ