بەيجىڭدە ازياداعى ءوزارا ىقپالداستىق جانە سەنىم شارالارى كەڭەسىنىڭ فورۋمى اشىلدى

بەيجىڭ. قازاقپارات - بەيجىڭدە ازياداعى ءوزارا ىقپالداستىق جانە سەنىم شارالارى بويىنشا كەڭەستىڭ ۇكىمەتتىك ەمەس فورۋمىنىڭ ءبىرىنشى جىل سايىنعى كونفەرەنتسياسى ءوز جۇمىسىن باستادى.

 شاراعا باس ورتالىقتار، ماسس- مەديا، ۇكىمەتتىك ەمەس ۇيىمداردىڭ 270 تەن استام وكىلى، سونداي- اق ديپلوماتتار مەن قاتىسۋشى ەلدەردىڭ جوعارى وكىلەتتى ساياساتكەرلەرى، ا ءو ى س ش ك مەن ايماقتان تىس مەملەكەتتەردىڭ بايقاۋشىلارى قاتىسۋدا. مىسالى، فورۋمنىڭ قۇرمەتتى قوناقتارىنىڭ اراسىندا اۋعانستاننىڭ بۇرىنعى پرەزيدەنتى حاميد كارزاي، ءيزرايلدىڭ بۇرىنعى پرەمەرى ەحۋد باراك، پاكىستان ەلىنىڭ بۇرىنعى پرەمەر- ءمينيسترى رادجا پەرۆەز اشراف، كامبودجا (نورودوم سيريۆۋد) ، يران (الياكبار ۆالاياتي) ، قىرعىزستان (مۇراتبەك يماناليەۆ) ، تۇركيا (ياسار ياكيس) ەلدەرىنىڭ بۇرىنعى سىرتقى ىستەر مينيسترلەرى مەن باسقا دا ساياساتكەرلەر بولدى.

فورۋمنىڭ اشىلۋ سالتاناتىندا قىتاي حالىقتىق ساياسي كەڭەس بەرۋ كەڭەسىنىڭ ءتوراعاسى يۋي چجەنشەن ءسوز سويلەسە، ونىڭ ورىنباسارى چەن يۋان قاتىسۋشىلارعا ق ح ر ءتوراعاسى شي جينپيننىڭ سالەمدەسۋ حاتىن وقىپ ءوتتى.

 ەستەرىڭىزگە سالا كەتەيىك، ا ءوى س ش كەڭەسىنىڭ ۇكىمەتتىك ەمەس فورۋمىن وتكىزۋ باستاماسىن ازياداعى ءوزارا ىقپالداستىق جانە سەنىم شارالارى بويىنشا كەڭەستىڭ 4- ءسامميتىنىڭ بارىسىندا (2014 -جىلعى مامىر، شاڭحاي) ق ح ر ءتوراعاسى شي جينپين ۇسىنعان بولاتىن. سول جولى بۇل ۇيىمعا 2014-2016 -جىلدارى ءتوراعالىق ەتۋ مارتەبەسى قىتاي ەلىنە بەرىلگەن.