قازاقستاندا تۇرىك برەندىمەن كىلەم جانە توقىما بۇيىمدارى ءوندىرىسى جولعا قويىلادى

 استانا. قازاقپارات - قازاقستاندا تۇرىك برەندىمەن كىلەم جانە توقىما بۇيىمدارى ءوندىرىسى جولعا قويىلادى. بۇل تۋرالى بۇگىن ق ر پارلامەنتى ماجىلىسىندەگى ۇكىمەت ساعاتىندا ق ر ينۆەستيتسيالار جانە دامۋ ءمينيسترى اسەت يسەكەشيەۆ ءمالىم ەتتى.

 «اعىمداعى جىلى جەڭىل ونەركاسىپ سالاسىندا ءبىرقاتار ءوندىرىس ىسكە قوسىلادى. ول - تۇرىك برەندىمەن كىلەم جانە توقىما بۇيىمدارى ءوندىرىسى»، - دەدى مينيستر.

 ونىڭ اتاپ وتۋىنشە، بۇگىنگى تاڭدا ەلىمىزدەگى جەڭىل ونەركاسىپ سالاسىندا 25 ميلليون شارشى مەتر ماقتا- ماتا كەزدەمەسى، 150 مىڭ توننا مەتر كىلەم جانە كىلەم بۇيىمدارى، 100 مىڭ دانا ءتۇرلى جەمپىر، كارديگان، جيلەت جانە 500 مىڭ دانادان استام ەرلەر مەن ايەلدەر كيىمدەرى، شۇلىقتار مەن اياق كيىمدەر شىعارىلادى.

« كوپشىلىگى بىزدە جەڭىل ونەركاسىپ جوق، ەشتەڭە وندىرىلمەيدى، ءبارىن يمپورتتايمىز دەپ سانايدى. مەن ونىڭ بۇلاي ەمەستىگىن ايتقىم كەلەدى. جوعارىدا اتاپ وتكەندەرىم ناقتى كورسەتكىش بولا الادى»، - دەدى ءا. يسەكەشيەۆ.

ءمينيستردىڭ اتاپ وتۋىنشە، يندۋستريالاندىرۋدىڭ العاشقى 5  جىلدىعىنداعى 12 باسىمدىقتى سالانىڭ ءبىرى رەتىندە جەڭىل ونەركاسىپكە زور كوڭىل بولىنگەن.

 « كوپشىلىگى بۇل مەملەكەتتىك قولداۋدى پايدالاندى. ءونىم ءوندىرىسىنىڭ كولەمى 2,4 ەسە ءوستى. 2008 - جىلعى 27 ميلليارد  تەڭگەدەن 2014 - جىلى 66 ميلليارد تەڭگەگە دەيىن جەتتى. ارينە، مۇنىڭ تىم از ەكەندىگى تۇسىنىكتى. ويتكەنى، ءبىز 2 ميلليارد دوللاردان استام سومانىڭ ءونىمىن يمپورتتايمىز. دەگەنمەن، بۇل سالادا ءوسىم بار. نارەستەلەرگە ارنالعان كيىم- كەشەك ءوندىرىسى 7 ەسەگە، باس كيىمدەر 4 ەسەگە، توقىما، دايىن بۇيىم، توسەك جابىندىلارى 3 ەسەگە ارتتى. بۇعان قوسا، سوڭعى 5 - جىلدىڭ ىشىندە نەگىزگى كاپيتالعا سالىنعان ينۆەستيتسيا كولەمى 6,8 ەسەگە ءوستى. بۇل كاسىپورىنداردىڭ بۇل سالاعا ينۆەستيتسيا قۇيا باستاعانىن بىلدىرەدى»، - دەدى ءا. يسەكەشيەۆ.

 اۆتور: مارلان جيەمباي