استانادا سيريالىق وپپوزيتسيا وكىلدەرىنىڭ كەلىسسوزدەرى باستالادى
بۇل تۋرالى ق ر س ءى م باسپا ءسوز قىزمەتى حابارلادى.
بۇگىن بۇكىل الەم تاياۋ شىعىستا بولىپ جاتقان وقيعالارعا الاڭداۋشىلىق تانىتۋدا. سيرياداعى جاعداي الەمدەگى ەڭ اۋىر داعدارىستىڭ بىرىنە اينالىپ، وڭىرلىك ماسەلەلەردىڭ شەگىنەن شىقتى.
قازاقستان ب ۇ ۇ قامقورلىعىمەن سيريانىڭ ىشىندە جانە سىرتىندا قولدانىلاتىن ديالوگ پەن ىمىرالاسۋ جولدارى ارقىلى ەلدەگى زورلىق پەن قانتوگىستى جەدەل توقتاتۋ ماقساتىندا اۋىر گۋمانيتارلىق اپاتتى ەڭسەرۋ جانە سيريا ساياسي بولاشاعىن ايقىنداۋعا باعىتتالعان ارەكەتتەردى قولدايدى.
وسىعان دەيىن سيريانىڭ وپپوزيتسيالىق كۇشتەر توبى قازاقستانعا سيرياداعى داعدارىستى رەتتەۋ ماسەلەسى بويىنشا كەلىسسوزدەردە دەلدالدىق ەتۋ تۋرالى ءوتىنىشىن بىلدىرگەنى بەلگىلى.
وسى ەلدەگى اسا اۋىر گۋمانيتارلىق جاعدايعا الاڭداۋشىلىق ءبىلدىرىپ، ىشكى سيريالىق شيەلەنىستىڭ تەك بەيبىت جولمەن جانە سيريالىقتار وزدەرى عانا شەشۋى قاجەت دەگەن باعدارىن بەرىك ۇستانىپ، قازاقستان سيريا وپپوزيتسيالىق كۇشتەر وكىلدەرىنىڭ ديالوگى الاڭىن ۇسىنۋ شەشىمىن قابىلدادى جانە كەلىسسوزدەردىڭ ءساتتى ءوتۋى ءۇشىن قاجەتتى جاعداي جاسادى.
سونىمەن بىرگە، قازاقستان سيريالىقتار اراسىنداعى كەلىسسوزدەر سيرياداعى شيەلەنىستى رەتتەۋ جونىندەگى جەنيەۆا ۇدەرىسى شەڭبەرىندە ودان ءارى جالعاساتىنىنا جانە ناتيجەلى اياقتالاتىنىنا ۇمىتتەنىپ، الداعى استاناداعى كونسۋلتاتسيالار جەنيەۆاداعى كەلىسسوزدەردىڭ ءساتتى وتۋىنە قوسىمشا دەمەۋ بەرەدى دەپ نيەتتەنۋدە.
كەلىسسوزدەر جابىق ەسىك فورماتىندا وتەتىن بولادى. ولاردىڭ ناتيجەسى بويىنشا قاتىسۋشىلاردىڭ باسپا ءسوز- كونفەرەنسياسى وتەدى دەپ كۇتىلۋدە. ناقتى ورنى مەن ۋاقىتى تۋرالى اقپارات قوسىمشا حابارلاناتىن بولادى.
