اماندىق باتالوۆ: «جەتىسۋ» تەلەارناسى حابارلارىنىڭ دەڭگەيى كەز كەلگەن رەسپۋبليكالىق ارنادان كەم تۇسپەۋى ءتيىس
بۇل تۋرالى الماتى وبلىسىنىڭ اكىمى اماندىق باتالوۆتىڭ تالدىقورعان قالاسىنداعى باسپا ءۇيىن ارالاۋى بارىسىندا ءمالىم بولدى، دەپ حابارلايدى وبلىس اكىمدىگىنىڭ باسپا ءسوز قىزمەتىنەن.
باسپا ءۇيى عيماراتىن ارالاپ كورگەن وبلىس باسشىسى ا. باتالوۆ تەلەارنانىڭ جالپى الاڭى 800 شارشى مەتر بولاتىن ۇلكەن ستۋدياسىندا بولدى. «جەتىسۋ» تەلەارناسى» ج ش س باس ديرەكتورى بەيسەن قۇرانبەكتىڭ ايتۋىنشا، ستۋدياعا قاجەتتى بەينەكامەرالار، كراندار، جارىقتاندىرۋ قۇرىلعىلارى جانە باسقا دا قۇرالدار الىنىپ، ورناتىلۋدا.
بۇل ستۋديا 4 بولىك ستۋديادان تۇرماق. ونىڭ ءبىرىنشىسى - جاڭالىقتار، ەكىنشىسى - «تاڭجارىق» تاڭەرتەڭگىلىك باعدارلاماسى، ءۇشىنشىسى - توك- شوۋ، ءتورتىنشىسى - بالالارعا ارنالعان ينتەللەكتۋالدىق باعدارلامالار ستۋدياسى بولادى. وبلىس باسشىسى ءار ستۋديانىڭ دەكوراتسيالارىنىڭ جوبالارىن كوردى. سونىمەن قاتار «جەتىسۋ» تەلەارناسى لوگوتيپىنىڭ دە جاقىندا اۋىستىرۋ جوسپارلانىپ وتىرعان جاڭا ۇلگىسى ەسكيزدەرىنىڭ ءبىرىن بەكىتىپ بەردى.
مۇندا ۇلكەن ستۋديامەن قاتار جاڭالىقتاردىڭ شاعىن ستۋدياسى، سول سياقتى ۆيرتۋالدى ستۋديا دا ىسكە قوسىلماق.
وبلىس باسشىسى ەفيردى باسقارۋ پۋلتىنە كىرىپ، ورناتىلعان جاڭا قۇرال- جابدىقتاردى كوردى. وسى پۋلت ارقىلى «جەتىسۋ» تەلەارناسى بۇگىنگى كۇنى شىعىپ وتىرعان 4.3 فورماتتان زاماناۋي HD فورماتىنا اۋىسۋعا دايىن. جاڭا فورمات نەگىزىندە تەلەارنانىڭ بەينە تاراتۋ ساپاسى بىردەن 3 ەسەگە ارتپاق.
سونداي- اق Synegi Desctop باعدارلاماسىن مەڭگەرۋ ارقىلى ءاربىر جۋرناليست ءوزى ازىرلەگەن سيۋجەتىن ءوزى مونتاجداۋعا مۇمكىندىك الادى. وسى ماقساتتا بۇگىنگى كۇنى تەلەجۋرناليستەر ءۇشىن ۇيرەتۋ كۋرستارى وتكىزىلۋدە.
«اۋقىمى ۇلكەن، مۇمكىندىگى مول بۇل ستۋديالارعا الەمگە تانىمال، تەحنولوگيا سالاسىندا وزىق سانالاتىن ىرگەلى كومپانيالاردىڭ قۇرال- جابدىقتارىن الىپ، ورناتۋ ۇستىندەمىز. وسىنداي قولايلى جاعداي جاساۋدىڭ ارقاسىندا «جەتىسۋ» تەلەارناسىنىڭ جۇمىس ساپاسى، حابارلارىنىڭ دەڭگەيى كەز كەلگەن رەسپۋبليكالىق ارنادان ءبىر دە ءبىر كەم تۇسپەۋى ءتيىس»، - دەدى وبلىس باسشىسى ا. باتالوۆ.
