20:03, 24 - مامىر 2015 | GMT +5
بوكس: «استانا ارلانس» فينالىندا كۋبا كومانداسىنا قارسى شىعادى
استانا. قازاقپارات - بۇگىن بۇكىلالەمدىك بوكس سەرياسى (WSB) اياسىنداعى جارتىلاي فينالدىق كەزدەسۋدىڭ ەكىنشى كۇنىندە «استانا ارلانس» رەسەي قۇراماسىن 4:1 ەسەبىمەن ويسىراتا جەڭدى.
زاكير سافيۋللين ارتۋر سۋبحانقۇلوۆتى جەڭسە، ولجاس ساتتىبايەۆ كارەن ارۋتيۋنياننان، دانيار ەلەۋسىنوۆ ياكۋب نۋرييەۆتەن ايلاسىن اسىرعان.
ال نۇرداۋلەت جارمانوۆ يەدۋارد ياكۋشيەۆتەن جەڭىلدى. اسا اۋىر سالماقتا WSB تۋرنيرىندە العاش رەت شىققان يۆان دىچكو قارسىلاسى ماكسيم بابانيندى ەكىنشى راۋندتا تەحنيكالىق نوكاۋتپەن جارىس جولىنان ىعىستىردى.
ەسكە سالا كەتەيىك، جارتىلاي فينالدىڭ ءبىرىنشى كۇنىندە قازاق بوكسشىلارى رەسەيلىكتەردى 5:0 ەسەبىمەن تىزە بۇكتىرگەن ەدى. وسىلايشا، جارتىلاي فينالدا 9:1 ەسەبىمەن «استانا ارلانس» كومانداسىنىڭ مەرەيى ۇستەم بولدى.
فينالدا قازاقستاندىق كوماندا وسى ماۋسىمدا جەڭىلىس كورمەگەن «كۋبا دومادورەس» كلۋبىنىڭ بوكسشىلارىمەن قولعاپ تۇيىستىرەدى.
اۆتور: جاسۇلان جولدىبايەۆ
