سەنات ەل پرەزيدەنتىنىڭ وكىلەتتىلىگىن كەڭەيتەتىن زاڭ جوباسىن ماقۇلدادى
ا ق ش سەناتى ساۋدا تۋرالى زاڭ جوباسىن ماقۇلدادى. بۇل قۇجات ا ق ش پرەزيدەنتىنە حالىقارالىق ساۋدا كەلىسىمدەرىن جاساۋدا ايرىقشا وكىلەتتىلىك بەرەدى. اتاپ ايتقاندا، كونگرەسس اق ءۇي باسشىسى قول قويعان اتالعان كەلىسىمدەرگە وزگەرىستەر ەنگىزۋ قۇقىعىنان ايىرىلادى.
جوبا ماقۇلدانسا ازيا- تىنىق مۇحيتى ەلدەرىمەن ساۋدا- ساتتىق كەزىندە باج سالىعى الىنبايدى. قۇجاتتى قولداۋشىلار امەريكالىق ەكسپورتتىڭ ازياداعى ۇلەسى ارتاتىنىن العا تارتادى. ونىڭ ىشىندە، وسى ساۋدا كەلىسىمدەرىنەن ا ق ش- تىڭ اۋىلشارۋاشىلىق كاسىپورىندارى مەن ءدارى- دارمەك جانە تەحنولوگيا وندىرەتىن كومپانيالار ۇلكەن پايداعا كەنەلمەك.
رون ۋايدەن، ورەگون شتاتىنان سايلانعان سەناتور:
- جوعارى جالاقىلى جۇمىستارعا جول اشاتىن مۇمكىندىكتەردىڭ ءبىرى ەكسپورت ەكەنىن ءبىز جاقسى بىلەمىز. 2025 - جىلى ءبىر ميلليارد ادام ورتاشا تاپتى قۇراعالى وتىر. بۇلار - اقشالى ادامدار. ولار ءبىزدىڭ شارابىمىزدى، كومپيۋتەرىمىزدى، تىكۇشاقتار مەن ۇشاقتارىمىزدى، امەريكا برەندى بار بارلىق تاۋارلار مەن قىزمەتتەردى ساتىپ الايىن دەپ وتىر.
ءبىراق پرەزيدەنت وبامانىڭ پارتيالاستارى بۇل پىكىرمەن كەلىسپەي وتىر. ولار، كەرىسىنشە، ەلدەگى جۇمىس كۇشى ازياعا اعىلادى دەپ قاۋىپتەنۋدە. ونىڭ ۇستىنە زاڭ جوباسىنا نارازى توپ باج سالىعى الىنعان سوڭ، ا ق ش نارىعىن ازيالىق ەلدەردىڭ ارزان تاۋارلارى باسىپ، مۇنىڭ زاردابى جەرگىلىكتى وندىرۋشىلەرگە تيەدى دەپ دابىل قاعۋدا.
اتىشۋلى زاڭ جوباسىنىڭ سەناتتا قابىلداناتىنى بۇرىننان بەلگىلى بولعان جايت بولىپ تابىلادى. ساراپشىلار قىزۋ پىكىرتالاس ءالى الدا دەيدى. سەبەبى ساۋدا- ساتتىق تۋرالى كەلىسىمدى كەلەسى ايدا ا ق ش پارلامەنتىنىڭ تومەنگى پالاتاسى قارايدى.
