قىتايلىقتار تۇيە ءسۇتى ونىمىنە پاتەنت الدى
قىتايدا تۇيە سۇتىنەن جاسالعان ونىمدەرگە سۇرانىس ارتىپ كەلەدى. قازاعىمىزدىڭ سۇيىكتى سۋسىنى شۇباتتىڭ قاسيەتىن تۇسىنگەن قىتايلىقتار ونىڭ نەگىزىندە ءتۇرلى ەمدىك ونىمدەر شىعارۋدا.
«ۆانيۋان» ساۋدا كومپانياسى تۇيە سۇتىنەن جاسالاتىن ونىمدەرگە پاتەنت العان. ساۋداسىن شىنجاڭ اۆتونوميالىق رايونىنان باستاعان كومپانيانىڭ بۇگىندە قىتاي بويىنشا شۇبات ساۋدالايتىن جۇزدەن استام دۇكەنى بار.
لان يوۋ - نەگىزى قازاقتار مەكەن ەتەتىن شىنجاڭ اۋدانى، التاي ايماعىنىڭ تۋماسى. بەيجىڭدە دۇكەن اشىپ، تۇيە ءسۇتى ونىمدەرىن ساۋدالاعالى ءۇش جىل بولدى. ەكولوگيالىق جاعدايى ناشار بەيجىڭ تۇرعىندارى تازا، تابيعي ونىمگە ءزارۋ. ال شۇبات ەمدىك قاسيەتى مول ءونىم. لان يوۋ ۋلى اۋانىڭ اسەرىنەن ءتۇرلى اۋرۋعا شالدىققان تالاي ادامدى ساۋىقتىردىم، دەيدى. بۇگىندە تۇراقتى كليەنتتەرى كوپ، ساۋداسى قىزىپ تۇر.
«ۆانيۋان» كومپانياسى تۇيە ءسۇتى ونىمدەرىنە بۇگىندە پاتەنت الىپ العان. شۇبات ولارعا جىلىنا ءجۇز ميلليونداعان يۋان تابىس اكەلەدى. ولار قىتاي نارىعىن باعىندىردى، ەندى شۇباتتى «قىتايدىڭ عاجاپ سۋسىنى» دەپ امەريكا مەن ەۋروپا ەلدەرىنە شىعارماق.
داۋرەن باۋىرجان ۇلى
قازاقستان ارناسى
