ماقساتىم - حالقىمىزدىڭ تەكتىلىگىن ونەر ارقىلى بارشا الەمگە پاش ەتۋ - قولونەر شەبەرى گۇلنازىم ءومىرزاق - فوتو

استانا. قازاقپارات - قازاقستاننىڭ بەينەلەۋ ونەرىندەگى كەنجەلەۋ قالعان تۇسى - كەسكىندەمە ونەرىندەگى ءبىزكەستە ءادىسى. بۇگىندە سول ءداستۇرلى ونەرىمىزدىڭ زاماناۋي ۇلگىدە دامىتىپ وتىرعان شەبەر قىزدارىمىزدىڭ ءبىرى - «دارىن» سىيلىعىنىڭ يەگەرى، سۋرەتشىلەر وداعىنىڭ مۇشەسى گۇلنازىم ءومىرزاق.

گۇلنازىمنىڭ ءبىزكەستە تەحنيكاسىندا ورىندالعان تۋىندىلارىنىڭ باسقا قىلقالام شەبەرلەرىنەن ەرەكشەلىگى - قازاقتىڭ كەستە ونەرىن سۋرەتشىلىككە قوسۋىندا. ول بەينەلەۋ ونەرىنە قازاقتىڭ كەستە ونەرىن ەندىردى. سول ارقىلى قازاق كەسكىندەمە ونەرىنە جاڭا باعىت اكەلدى. بەينەلەۋ ونەرىنىڭ وسىنداي قيىن دا قىزىقتى جولىنا قالاي كەلگەندىگى جايلى گۇلنازىم بىزگە اڭگىمەلەپ بەردى.

- گۇلنازىم ءومىرزاق قىزى، بەينەلەۋ ونەرىنىڭ وسى ءبىزكەستە باعىتىن قالاي تاڭدادىڭىز؟ قىزىعۋشىلىعىڭىز قالاي قالىپتاستى؟

- ەسىمدى بىلگەن كەزدەن باستاپ انالارىمىزدىڭ قولىنان شىققان كيىز ءۇي ىشىندەگى تۇرمىستىق قولدانىستاعى اسەمدەپ تىككەن بۇيىمدار كوزدىڭ جاۋىن الۋشى ەدى. سولاردى كورىپ، ويىما توقىپ وسكەندىكتەن بولار، ءداستۇرلى ونەرگە دەگەن اۋەستىگىم تىم ەرتە وياندى. ونەر سالاسىنداعى العان ءبىلىمىم ءبىر باسىما جەتەرلىك، ەگەر كوكىرەگىمە توقىعانىم بولسا. ونەر ماگيسترىمىن. ماماندىعىم - سۋرەتشى- كەسكىندەمەشى (جيۆوپيس).

مىنە، بۇل توعاندارىم ءبىز كەستە ونەرمەن دە اينالىسۋىما ەشقانداي كەدەرگىسى جوق. قايتا قازاق حالقىنىڭ ءداستۇرلى ونەرىڭ دە بىرگە الىپ جۇرۋىمە مەنىڭ قىزىعۋشىلىعىمدى ارتتىرا ءتۇستى. ارينە، بۇل كوركەم شىعارما - ۇلتتىق مانەردەگى داستۇرگە اپاراتىن جاڭاشىل، باتىل باعىت ۇستاناتىن قاجىرلى ەڭبەكتى قاجەت ەتەتىن جۇمىس. ۇلتتىق ونەرىمىزدىڭ ماڭگىلىك ءداستۇرلى قازىناسىن زاماناۋي ونەر تۇرىنە قايتا جارامدى ەتىپ الەمدىك ونەر دەڭگەيىنە كوتەرەتىن مۇمكىندىك تۋدى.

- ءبىزكەستە ءادىسىن جان- جاقتى مەڭگەرگەن شەبەرلەر رەتىندە ەلىمىزگە تانىمال وتباسىسىزدار. اناڭىز بەن اكەڭىز، اپكەڭىز اينۇر دا سۋرەتشى- كەسكىندەمەشى ەكەنى بەلگىلى. سول كىسىلەردەن باعىت- باعدار الىپ، قازىردە وزىندىك قولتاڭباسى بار قولونەر شەبەرىسىز. سولار جايلى ءبىراز ماعلۇمات بەرىپ كەتسەڭىز.. .

 - مەن ءوز ونەرىمدە شىعارماشىلىق ىزدەنۋ بارىسىندا تەحنيكالىق ءادىس- ءتاسىلدى جان- جاقتى قولدانا وتىرىپ، ءبىز كەستە ونەرىندە وزىندىك قولتاڭباسى بار بەلگىلى قولونەر شەبەرى انام راحمەتباي قىزى كالەمحاننان ۇيرەنگەندىگىمدى ماقتان ەتە الامىن. قازاق بەينەلەۋ ونەرىندە وزىندىك ورنى قالىپتاسقان بەلگىلى سۋرەتشى، اكەم رىستان ءومىرزاقتىڭ جاڭا مانەردەگى كوركەمدىك ىزدەنىستەرىن كەستەلەۋ ونەرىنە وزگەشە باعىتتا ءتۇسىرۋ ارقىلى ءبىزدىڭ وتباسىمىزدا وزىندىك مەكتەبىمىز قالىپتاستى. وسى ارقىلى ءداستۇرلى حالىق ونەرى كوركەم شىعارماشىلىق دارەجەگە دەيىن كوتەرىلدى. ءبىز كەستە ونەرىندە انامدى، شىعارماشىل جۇمىستار جاعىنان اكەمدى وزىمە ۇستاز تۇتامىن. ماقساتىم - حالقىمىزدىڭ تەكتىلىگىن ونەر ارقىلى بارشا الەمگە پاش ەتۋ. مەن ونەردى جان- تانىممەن سۇيەمىن. قانداي دا ءبىر جاڭا شىعارماشىل وي تۋىندار الدىندا تاماشا اۋەن تىنداۋ مەنىڭ ىشكى جان دۇنيەمدى تەربەيدى جانە ءتۇرلى ءتۇستى بوياۋلار ارقىلى جەتكىزەمىن.

  

- كەستەلەۋ ونەرى - ءتوزىمدى، قاجىرلىقتى تالاپ ەتەتىن ونەر ءتۇرى. ءوزىڭىزدىڭ وسى سالادا شاكىرتتەرىڭىز بار ما؟ جالپى جاستاردىڭ قىزىعۋشىلىعى قانداي؟

- مەنىڭ بۇگىنگە دەيىنگى جاساپ جاتقان ازدى- كوپتى تۋىندىلارىم حالقىمىزدىن ەستەتيكالىق تالعامىنىڭ بيىك دەڭگەيىنە كوتەرىلۋىنە ءبىر مىسقال بولسا دا قىزمەت ەتسە دەيمىن. قازىرگى كۇندە ءبىراز ءۇمىت كۇتتىرەرلىك شاكىرتتەرىم بار. ءبىر ستۋدەنتىم پرەزيدەنت كۇنىنە بايلانىستى رەسپۋبليكالىق بايقاۋدان گران- پري جۇلدەسىن الدى.

- جاقىندا تۇڭعىش پرەزيدەنت مۋزەيىندە كورمەڭىز وتكەنى بەلگىلى. تاعى قاي جەرلەردە كورمە وتكىزۋدى جوسپارلاپ وتىرسىز؟ الداعى جوسپارلارىڭىزبەن بولىسسەڭىز.

- بيىلعى جىل - تاريحي داتالى كۇندەر جىلى. ول دا وي تەبىرەنتەدى، يدەيا قوسادى. قازىر ەسكيزدىك جوبا دەڭگەيىندە جاسالىپ جاتىر. شىعارماشىلىق جولىمدا بيىككە كوتەرىلىپ، ونەر جولىندا حالقىمىزعا تاماشا تۋىندىلار سىيلاپ قۋانتسام دەيمىن. جانە دە كوپ كارتينالار جاساپ دۇنيە ءجۇزىن ارالاپ كورمەلەرىمدى وتكىزۋ جوسپارىم دا بار. بيىل استانادا اپكەم اينۇر ءومىرزاق ەكەۋمىز تۇڭعىش پرەزيدەنت مۋزەيىندە جەكە كورمەمىزدى وتكىزدىك. ال وسى مامىر ايىندا ليۋكسەمبۋرگ قالاسىندا كورشى ەلدەر دوستىعى اتتى حالىقارالىق فەستيۆالگە دايىندالىپ وتىرمىن.

- اڭگىمەڭىزگە راحمەت! شىعارماشىلىق تابىستار تىلەيمىن!

 ايتا كەتەيىك، گۇلنازىم ءومىرزاق 1986 - جىلدىڭ 11 - ناۋرىزىندا تۋىلعان. 2009 - جىلى ت. جۇرگەنوۆ اتىنداعى قازاق ۇلتتىق ونەر اكادەمياسىنداعى ماگيستراتۋرانى بىتىرگەن. 1996 - جىلى جاس تالانتتاردىڭ «اينالايىن» 1- حالىقارالىق فەستيۆالىنىڭ لاۋرەاتى اتانادى. 2002 - جىلى استانا قالاسىندا 5- حالىقارالىق مەرەكەلىك «شابىت» شىعارماشىل جاستار فەستيۆالىنىڭ لاۋرەاتى بولىپ التىن مەدالىمەن ماراپاتتالدى.

 2003 -جىلى يۋنەسكو- نىڭ الماتىداعى بيۋروسىنىڭ «ريسۋيۋت دەتي ميرا: قازاقستان» اتتى حالىقارالىق البومدار سەرياسىنا ەنگەنى ءۇشىن سەرتيفيكاتقا يە بولدى. 2006 - جىلى فرانسيادا اكادەميا اتىنان ماماندىعىن شىنداپ قايتتى. 2010 -جىلى رەسپۋبليكالىق «قاناتتى ايەل-3» يدەيالار مەن تاۋارلار جارمەڭكەسىنىڭ ديپلومىمەن ماراپاتتالعان. 2010 -جىلى حالىقارالىق جاستار شىعارماشىلىعىنىڭ مەملەكەتتىك «دارىن» سىيلىعىنىڭ يەگەرى اتاندى، 2012 -جىلى «شابىت» فەستيۆالىندە «ءبيشى» اتتى جۇمىسى ءۇشىن ءى ورىن الىپ، التىن مەدال يەلەندى، ق ر سۋرەتشىلەر وداعىنىڭ مۇشەسى.

 بۇگىنگى تاڭدا ءوز ونەرىمەن ەلىمىزگە جانە شەتەلدەرگە تانىمال بولعان گۇلنازىم ءومىرزاقتىڭ شىعارماشىلىق جۇمىستارى لوندون، ليۋكسەمبۋرگ قالالارى جانە گەرمانيا، فرانتسيا، تۇركيا، رەسەي ەلدەرىندەگى ونەر گالەرەيالارىندا ساقتاۋلى، سونىمەن قاتار ەلىمىزدەگى مەملەكەتتىك مەكەمەلەر مەن قوعامدىق ۇيىمداردىڭ ينتەرەرىنە قويىلعان.

 سۇحباتتاسقان: گۇلدەن وسپانوۆا