قازاقستانعا «سۇلەيمەن سۇلتان» تەلەحيكاياسىندا ويناعان تانىمال تۇرىك اكتەرى العاش رەت كەلەدى - فوتو

استانا. قازاقپارات - تانىمال تۇرىك اكتەرى، بۇرىنعى مودەل بۋراك وزچيۆيت الماتى مەن استانا قالالارىندا بولىپ قايتتى. بۇل ونىڭ قازاقستانعا العاش رەت كەلۋى، دەپ حابارلايدى «قازاقستان» ر ت ر ك باسپا ءسوز قىزمەتىنەن.

سونىمەن قاتار ول «ماحابباتىم ساعان ۇقسايدى» فيلمىندە العاش رەت پروديۋسەر قىرىنان تانىلىپ وتىر. ول ءبىزدىڭ ەلىمىزگە ءدال وسى فيلمنىڭ تۇساۋكەسەرىن وتكىزۋ ءۇشىن ارنايى كەلگەن.

«سۇلەيمەن سۇلتان» تەلەحيكاياسىندا مالكوچوگلۋ بالي بەي ءرولىن سومداعاننان كەيىن وزچيۆيت قازاقستاندىق كورەرمەندەردىڭ سۇيىكتى كەيىپكەرىنە اينالدى. ونىڭ ايتۋىنشا، الداعى ۋاقىتتا تەلەحيكايانىڭ جالعاسى ءتۇسىرىلۋى ابدەن مۇمكىن.

بەلگىلى اكتەر قازاقستاندىق رەجيسسەرلاردان كينوعا ءتۇسۋ تۋرالى ۇسىنىس ءتۇسىپ جاتسا، وعان ابدەن دايىن ەكەنىن دە جاسىرمادى.

23 - مامىر كۇنى بۋراك وزچيۆيت «قازاقستان» تەلەارناسىنىڭ ءتۇسىرىلىم الاڭىنا كەلىپ، «تۇنگى ستۋديادا نۇرلان قويانبايەۆ» تۇنگى شوۋىنىڭ قادىرمەندى قوناعى بولدى. ول نۇرلاننىڭ بىرنەشە سۇراقتارىنا جاۋاپ بەرىپ، قازاقتىڭ ۇلتتىق تاعامى - قۇرتتى جارنامالاپ، باسكەتبول وينادى. وسى جانە باسقا دا قىزىقتى جايتتار جايلى اكتەردىڭ قاتىسۋىمەن وتكەن باعدارلاما «قازاقستان» تەلەارناسىنىڭ ەفيرىندە 26 - مامىر كۇنى ساعات 23.30 دا شىعادى.

بۋراك العاش رەت كينوعا 19 جاسىندا تۇسكەن. 2005 - جىلى تۇرىكتىڭ ۇلتتىق «Best Model Of Turkey» سۇلۋلىق سايىسىنىڭ جەڭىمپازى اتانىپ، ەرلەر اراسىنداعى   «Best Model Of The World» سايىسىندا جۇلدەلى ەكىنشى ورىندى يەلەنەدى.