بەلگىلى جازۋشى ديداحمەت ءاشىمحان دۇنيەدەن ءوتتى
جازۋشىمەن قوشتاسۋ ءراسىمى ەرتەڭ ساعات 09:30-دا الماتى قالاسىنداعى جازۋشىلار وداعىنىڭ عيماراتىندا وتەدى. دۇيسەنبى كۇنى تۋعان جەرى شىعىس قازاقستان وبلىسى، قاتونقاراعاي اۋدانىنا جەرلەنەدى.
ديداحمەت ءاشىمحان 1950 - جىلى 10 - ماۋسىمدا شىعىس قازاقستان وبلىسى، قاتونقاراعاي اۋدانى، جاڭاۇلگى اۋىلىندا تۋعان. 1978 - جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن بىتىرگەن. ەڭبەك جولىن تۋعان وڭىرىندەگى «كوممۋنيزم تۋى» گازەتىندە باستاعان قالامگەر «لەنينشىل جاس»، «قازاق پيونەرى»، «قازاق ادەبيەتى»، «زامان - قازاقستان» جانە «تۇركىستان» سىندى گازەتتەردە قىزمەت اتقاردى.
«اققابانىڭ تولقىنى»، «ون ءبىرىنشى كۇز»، «كامەننايا پاد»، «جەر اڭساعاي سارى اتان»، «سامىرسىن سازى» جانە «اڭگىمە ەمەس اڭگىمەلەر» اتتى بىرنەشە اڭگىمەلەر مەن پوۆەستەر جيناعىنىڭ اۆتورى. شىعارمالارى وزبەك، قىرعىز، قىتاي، موڭعول، ورىس، ۋكراين جانە ماري تىلدەرىنە اۋدارىلعان. سونداي- اق، جازۋشىنىڭ ءوزى دە وزگە ۇلتتىڭ بەلگىلى قالامگەرلەرىنىڭ ەڭبەكتەرىن قازاق تىلىنە اۋداردى.
جازۋشىنىڭ قايتىس بولۋىنا وراي ارىپتەستەرى قايعىلارىن بىلدىرۋدە.
ديداحمەت اعامەن 10 جىل ارىپتەس بولعان «تۇركىستان» گازەتىنىڭ قىزمەتكەرى ءنازيا جويامەرگەن قىزى فەيسبۋك الەۋمەتتىك جەلىسىندەگى پاراقشاسىندا بىرەر ساعات بۇرىن: «قوناقاسىدان كەلدىك. ديداعاڭنىڭ دەمى ءۇزىلىپتى تاڭ اتا. ەسەڭگىرەتىپ كەتكەن، توسىننان جەتكەن قايعىلى حابار.. . كۇنى كەشە عانا جايناڭداپ، جايراڭداپ جۇرگەن ەدى «تۇركىستاندا». «ءبارى دۇرىس» دەگەن ەدى دەنساۋلىعىن سۇراعاندا. ءبارى دۇرىس ەمەس ەكەن. عازيز جۇرەگى كىلت توقتاپتى ابزال اعامنىڭ.. . شارشاعان شىعار، ءسىرا.. . ۇنەمى ۇلتتىڭ ماسەلەسىن قوزعايتىن. ەرتەڭ «جازۋشىلار وداعىنان» التاي اسادى اعام. تۋعان توپىراعىنا. قوش، ديداعا. اللا الدىڭىزدان جارىلقاسىن.. .»، دەپ جازادى.
