اتىراۋلىق ستۋدەنتتەر ءبىر كۇنىن اسكەردە وتكىزدى - فوتو

اتىراۋ. قازاقپارات - اتىراۋ قالاسىنىڭ جوعارى جانە ورتا ارنايى وقۋ ورىندارىنىڭ ستۋدەنتتەرى ءبىر كۇنىن اسكەردە وتكىزدى.

جاسوسپىرىمدەر «باتىس» وڭىرلىك قولباسشىلىعىنا قاراستى 41433 اسكەري ءبولىم اسكەري قىزمەتشىلەرىنىڭ تىنىس- تىرشىلىگىمەن تانىستى، اسكەري ءبولىم ءىشىن ارالاپ، جاۋىنگەرلەردىڭ تاۋلىكتىك جاۋىنگەرلىك كەزەكشىلىكتى اتقارۋ بەكەتىندە، سونداي- اق جەكە قۇرامنىڭ ساباقتارىندا بولدى.

بارىنەن بۇرىن ستۋدەنتتەر ەسىندە جاۋىنگەرلىك ماشينالار پاركى قالدى. ول 41433 اسكەري ءبولىمنىڭ ماقتانىشى بولىپ تابىلادى. مۇندا اسكەري كيىم نىسانىنىڭ ۇلگىلەرى، قازىرگى زامانعى قارۋ- جاراق پەن قازاقستاندىق ارميانىڭ اسكەري تەحنيكاسى جينالعان.

ارمياداعى ءبىر كۇن اتىراۋلىق ستۋدەنتتەر ءۇشىن ارنايى ماقساتتاعى ەكىنشى روتا اسكەري قىزمەتشىلەرىنىڭ كورسەتىلىمىمەن اياقتالدى. جاۋىنگەرلەر قويان- قولتىق ۇرىستىڭ، جاۋىنگەرلىك جانە دەنە دايارلىعىنىڭ كوز تارتارلىق ەلەمەنتتەرىن كورسەتتى.

 «ءبىزدىڭ اسكەري بولىمگە كەلگەن جاسوسپىرىمدەردىڭ كوزدەرىنەن جالىن بايقادىم. ولار جاۋىنگەرلەردىڭ ءىس- قيمىلدارىن قىزىعا جانە تاڭدانا قارادى. جاستارىمىزعا اسكەري- پاتريوتتىق تاربيە بەرۋ ءدال وسىنداي قايسار، باتىر، مىقتى اسكەري قىزمەتشىلەردەن باستالادى دەپ ويلايمىن. بۇل جاس جەتكىنشەكتەر ءۇشىن جاقسى ۇلگى» ، - دەپ اتاپ ءوتتى 41433 اسكەري ءبولىمنىڭ كومانديرى مايور ۇلان نۇرعازيەۆ.