قازاقستان كوپتەگەن كەلەلى ماسەلەلەر تالقىلاناتىن الاڭ رەتىندە ادامزات قاۋىمىنىڭ تولعاقتى ماسەلەلەرىن شەشۋگە ءوز ۇلەسىن قوسۋدا
بۇل تۋرالى «ەگەمەن قازاقستان» گازەتىنە بەرگەن سۇحباتىندا VIII استانا ەكونوميكالىق فورۋمىنا قاتىسۋشىلاردىڭ ءبىرى، Goldman Sachs كومپانياسىنىڭ رەسەي جانە ت م د بويىنشا باس ەكونوميسى، جاڭا نارىقتار بويىنشا زەرتتەۋلەردىڭ جەتەكشىسى كلەمەنس گراف ايتتى.
«قازاقستانعا ەڭ العاش وتكەن عاسىردىڭ 90- جىلدارىنىڭ باسىندا كەلگەن بولاتىنمىن. مۇنان كەيىن دە تالاي كەلۋدىڭ ءساتى ءتۇستى. استانا ەكونوميكالىق فورۋمىنا دا جۇيەلى تۇردە قاتىسىپ كەلەمىن. بۇگىن فورۋمنان العان اسەرلەرىم كوپ. مەن مۇندا «جاھاندىق ەكونوميكاداعى ەكونوميكالىق، قارجىلىق جانە مونەتارلىق وزگەرىستەر» اتتى سەسسياعا قاتىستىم. جاڭا عانا ونىڭ وڭىرلىك ماكروەكونوميكالىق ۇدەرىستەردىڭ ورتالىق ازيا مەن كورشى ەلدەرگە ىقپالى تاقىرىبىنا ارنالعان باس قوسۋىندا بولدىم. مۇندا ءسوز الىپ، ءوز وي-پىكىرلەرىمدى ورتاعا سالدىم. شىنىن ايتقاندا، قازىر الەمدە قارجى جاعدايى جاقسى ەمەس. كوپتەگەن ەلدەردىڭ ەڭسەسىن بورىش داعدارىسى باسىپ تۇر. ال، قازاقستان بولسا جىلدان-جىلعا نىعايىپ كەلەدى. ونىڭ ۇستىنە حالىقارالىق ۇلكەن فورۋمدار وتەتىن، كوپتەگەن كەلەلى ماسەلەلەر تالقىلاناتىن الاڭ رەتىندە ادامزات قاۋىمىنىڭ تولعاقتى ماسەلەلەرىن شەشۋگە ءوز ۇلەسىن قوسۋدا. بۇل وتە جاقسى، باعالاۋعا لايىقتى قۇبىلىس. وسىنىڭ بارلىعى قازاقستاندا مەملەكەتتىك ساياساتتىڭ كەمەلدەنگەندىگىنىڭ ءبىر كورىنىسى. بۇگىن مەملەكەت باسشىسى نۇرسۇلتان نازاربايەۆتىڭ 100 قادامنان تۇراتىن بەس رەفورماسىمەن تانىستىم. ودان جاقسى اسەر الدىم. وسىنداي ناقتى قادامدار قاي ەلگە بولسا دا ارتىقتىق ەتپەيدى. ال، ءوز تاۋەلسىزدىگىنە يە بولعاندارىنا كوپ بولا قويماعان ەلدەر ءۇشىن تىپتەن دە قاجەتتى شارا. ودان ءاربىر ەل ۇلگى الۋى ءتيىس دەپ ويلايمىن»، - دەيدى شەتەلدىك ساراپشى.
اۆتور: قانات مامەتقازى ۇلى
