استانادا «مەنىڭ سۇيىكتى مۋلتفيلمىم» اكسياسى ءوتتى
شارا «مەگا-استانا» ويىن-ساۋىق ورتالىعىنداعى «مارۆين» دۇكەنىندە ءوتتى. اتالمىش اكسيا بۇعان دەيىن الماتى قالاسىندا وتكىزىلگەن بولاتىن. ونىڭ نەگىزگى ماقساتى - وتاندىق انيماتسيانى ناسيحاتتاۋ، قولداۋ كورسەتۋ.
اتالمىش ءىس-شاراعا استانا قالاسىنىڭ بۇلدىرشىندەرى قاتىستى. ولار «بالاپان» تەلەارناسىنان كورسەتىلەتىن «ءالي مەن ايا» مۋلتفيلمىندەگى كەيىپكەرلەردىڭ سۋرەتىن سالىپ، بوياۋ سايىسىنا ءتۇستى. ۆيكتورينالىق سۇراقتارعا جاۋاپ بەرىپ، ەرمەك سازبەن ءتۇرلى مۇسىندەر جاسادى. سونداي-اق، مۋزىكا قۇراستىرىپ، ءتۇرلى ويىندار وينادى. جەڭىمپازدارعا سىيلىقتار، ءتاتتى توقاشتار تاراتىلدى.
ايتا كەتۋ كەرەك، 20 سەريادان تۇراتىن جانە زامانۋي 3D انيماتسيامەن جاسالعان «ءالي مەن ايا» مۋلت توپتاماسى مەكتەپ جاسىنا دەيىنگى بالالاردىڭ وي-ءورىسىن، ويلاۋ قابىلەتىن كەڭەيتىپ، اينالاداعى ادامدارمەن قارىم-قاتىناسىن دامىتۋدا تاربيەلىك ءمانى وراسان زور تاپتىرماس قۇرال بولىپ تابىلادى.
مۋلت حيكايا وندىرىسىنە حالىقارالىق دارەجەدە تانىمال انيماتورلار قاتىستى. مۋلت توپتامادا اۋىلعا اتا-اجەسىنە كەلگەن ءالي مەن ايا ارقىلى تەلەديدار الدىنداعى بالدىرعانداردى قورشاعان ورتامەن تانىستىرىپ، كىشكەنتاي بالالاردىڭ اتاسى مەن اجەسىنە سۇراق قويۋى مەن وعان الىناتىن جاۋاپتار تەك اڭگىمە رەتىندە ەمەس، ۇتىمدى انيماتسيالىق گرافيكالىق شەشىمدەر ارقىلى كورىنىس تابادى. ءار بولىمدە قازاقتىڭ ادەت-عۇرىپ، سالت-داستۇرلەرىن، ۇلتتىق اسپاپتار، ويىندار، تاعامدار، بۇيىمداردى ۇيرەتۋ ارقىلى اتا-بابا داستۇرىمەن تانىستىرىپ، رۋحاني بايلىعىمىز بالالاردىڭ بويلارىنا سىڭىرىلەدى.
مەكتەپ جاسى الدىنداعى بۇلدىرشىندەردى ءارىپ تانىتىپ، ساناماققا، ءان سالدىرىپ، ۇلتتىق ءبيدىڭ كەيبىر جەڭىل ەلەمەنتتەرىن ۇيرەتەدى. تەلەحيكايانىڭ ءار بولىمىندە كەم دەگەندە ءبىر جاڭا ءان سابيلەر ءۇشىن جازىلىپ، ولاردىڭ تەز جاتتاپ الىپ، ايتۋىنا مۇمكىندىك بەرەدى.
ءبىر سوزبەن ايتقاندا، مۋلتحيكايانىڭ ءاربىر بولىمىندە ءسابيدىڭ ءوزىن قورشاعان ورتانى تاني باستايتىن ەڭ سۇيكىمدى، ەڭ قىلىقتى شاعىندا «ول كىم؟ بۇل نە؟» دەگەن سۇراقتارعا مولىنان جاۋاپ بەرىلەدى.
