تالدىقورعاندا «قۇنانباي» فيلمىنىڭ پرەمەراسى بولدى
ونى كوپشىلىكپەن بىرگە ءوڭىر باسشىسى اماندىق باتالوۆ تا تاماشالادى.
اعا سۇلتاندىق ەتكەن كەزدەگى ۇستانىمىن، كوزقاراسىن، ارەكەتىن فيلمگە ارقاۋ ەتە وتىرىپ، سول كەزەڭدەگى ەل باسقارۋ ءىسىنىڭ قيىندىعى مەن جاۋاپكەرشىلىگىن پاراساتپەن ارقالاي بىلگەن قۇنانباي بەينەسى كورەرمەننىڭ كوڭىلىنەن شىقتى. ابايدىڭ قازاقتىڭ ماڭدايىنا بىتكەن اقىن ءارى حاكىم اباي بولىپ قالىپتاسۋىندا ۇلكەن ىقپال ەتكەن ايتۋلى تۇلعانىڭ تالايلى تاعدىرى شىنايى بەرىلدى.
كورسەتىلىمنەن سوڭ ساحناعا شىققان قازاقستاننىڭ حالىق ءارتىسى، فيلمنىڭ باس رەجيسسەرى ءارى باس كەيىپكەرىن سومداعان دوسحان جولجاقسىنوۆ فيلمدە وزىنە سەرىك بولعان، دەم بەرگەن وبلىستىق دراما تەاتر ارتىستەرىنە، ۇنەمى حالىقتىڭ ونەرىنە قولداۋ كورسەتىپ جۇرەتىن الماتى وبلىسىنىڭ اكىمى اماندىق باتالوۆقا جانە كينونى سوڭىنا دەيىن اسا ىجداھاتتىلىقپەن تاماشالاعان كوپشىلىك قاۋىمعا ريزاشىلىعىن جەتكىزدى.
ونىڭ ايتۋىنشا، فيلم شىعىس قازاقستان وبلىسىنىڭ اۋماعىندا 1 اي 18 كۇندە ءتۇسىرىلىپتى. كينو دايىن بولعانىنا نەبارى 5 كۇن بولعاندا تالدىقورعاندا كورسەتىلىپ وتىر. وندا ەلىمىزدىڭ بارلىق تەاترلارىنان شاقىرىلعان مىقتى دەگەن اكتەرلار شوعىرى ويناعان. سونىڭ ىشىندە ب. ريموۆا اتىنداعى الماتى وبلىستىق دراما تەاترىنىڭ ارتىستەرى ومىرسەرىك قاليەۆ، كەندەباي تەمىرباي ۇلى، ساعىندىق ءجۇمادىلوۆ، سەرىك نۇرحالىق تا بار ەكەنىن اتاپ ءوتۋ كەرەك.
وبلىس باسشىسى ا. باتالوۆ ءوز كەزەگىندە دوسحان جولجاقسىنوۆ باستاعان شىعارماشىلىق ۇجىمعا العىس ايتتى.
