استانادا «قىتايدىڭ ۇلتتىق جانە شىعارماشىلىق قويىلىمدارى» اتتى كونسەرتى ءوتتى - كەسكىن، فوتو

استانا. قازاقپارات - بۇگىن استانا قالاسىندا «بەيبىتشىلىك جانە كەلىسىم» سارايىندا «قىتايدىڭ ۇلتتىق جانە شىعارماشىلىق قويىلىمدارى» اتتى كونسەرتى ءوتتى.

اتالعان كەشتى استانا اكىمدىگى مەن قىتاي حالىق رەسپۋبليكاسىنىڭ ەلشىلىگى بىرلەسە ەكىجاقتى مادەني قارىم-قاتىناستاردى نىعايتۋ ماقساتىندا ۇيىمداستىردى.

شاراعا بۇكىل مەملەكەتتىڭ نىشانىن ايقىندايتىن قىتايدىڭ ورتالىق ۇلتتىق ءان-ءبي ءانسامبلىنىڭ ونەرپازدارى ونەر كورسەتتى. بۇل ۇجىمنىڭ «ياو ۇلتتىق ءبي مۋزىكاسى»، «باتىس تاۋىنىڭ باللاداسى»، «ەلۋ بەس ۇلت - ەلۋ بەس ءتۇس» اندەرى، سونىمەن قاتار، «تۇزدەگى جەبە»، «تورعاي رۋحى»، «سۇيكىمدى راۋشان گۇلى» بيلەرى سەكىلدى بارشا الەمدە ۇلكەن سۇرانىسقا يە ونەرلەرى مەن شىعارمالارىن ەلوردا تۇرعىندارىنا پاش ەتتى.

«قىتايدىڭ ۇلتتىق جانە شىعارماشىلىق قويىلىمدارى» كونسەرتىنىڭ اياسىندا استانادا موڭعول، كورەي، ۇيعىر، تيبەت مادەنيەتتەرىنىڭ وكىلدەرى دە ءوز ونەرلەرىن ورتاعا سالدى. ۇلتتىق انسامبل قۇرامىندا دين ۆەي، تسزيان داۆەي، دەدەما، يان ليپين، تەنگەەر، ت. ب. ونەر يەلەرى بار.

مۇنداي شارالار ەكى ەلدىڭ اراسىنداعى بىرلىكتى نىعايتىپ، مادەني-رۋحاني بايلانىستى دامىتادى.

كۇنسۇلتان وتارباي