ەلباسى: الەمدىك عىلىمنىڭ ۇزدىك وكىلدەرىمەن بىرلەسە ءتونۋى مۇمكىن اپاتتاردان ەلدەردى ساقتاپ قالۋعا مىندەتتىمىز
«مىنە، جەتى جىلدان بەرى الەمدىك ەكونوميكا تولىق قالپىنا كەلە الماي كەلەدى جانە بۇرىنعى دامۋ قارقىنىن قايتارا العان جوق. جۇمىسسىزدىقتىڭ جوعارى دەڭگەيى، قارىزدىڭ ءوسۋى سەكىلدى ورنىقتى پروبلەمالار ساقتالۋدا. كوپتەگەن ساراپشىلار قازىرگى كەزدە ەكونوميكا بىرتىندەپ قالپىنا كەلە جاتقانىن ايتۋدا، الايدا، ءوسىم دەڭگەيى بولەك-بولەك. كوپتەگەن ەلدەر ستاگناتسيادان شىعا الماي كەلەدى»، - دەدى مەملەكەت باسشىسى.
سونىمەن قاتار پرەزيدەنت كەيبىر ەكونوميستەر 2008-جىلى باستالعان جاھاندىق داعدارىس جۇيەلى سيپاتقا يە ەكەنىن جانە بۇل داعدارىس نەگىزگى سەبەپتەرى جويىلعاننان كەيىن عانا اياقتالاتىنىن العا تارتىپ وتىرعاندىعىن جەتكىزدى. ياعني، بۇل تۇرعىدا تەرەڭگە تامىرىن جايعان تەڭگەرىمسىزدىكتى، ءبىرىنشى كەزەكتە ۆاليۋتالىق جانە ساۋدا نارىقتارىنداعى احۋال رەتتەلگەن كەزدە دامۋ قارقىنى باستالادى.
«ولاردىڭ پايىمىنشا، كوپشىلىكتىڭ تۋربۋلەنتتىلىك دەپ قابىلداپ جۇرگەن قۇبىلىس شىن مانىندە جاھاندىق داعدارىستىڭ كەلەسى كەزەڭىنىڭ پايدا بولۋىنىڭ جاسىرىن، لاتەنتتىك فورماسى بولىپ تابىلادى. ول قارجىلىق سالادان زاڭسىز سانكتسيالار مەن الەۋمەتتىك-ساياسي سوعىستار تۇرىندە ۆاليۋتالىق سوعىستار، ەكونوميكالىق سوعىستار سالاسىنا اۋىسۋدا. تاياۋ شىعىستاعى - سيرياداعى، اۋعانستانداعى، ليۆانداعى داعدارىستىق احۋال دا وسىنىڭ سالدارى. ءدال وسى جاعداي باتىس پەن شىعىستىڭ، ا ق ش پەن ناتو-نىڭ رەسەي مەن قىتايعا قارسىلىقتىڭ ارتۋىن تۋدىرادى. ال ەگەر جاقىن ارادا ءبىز ايتىپ جۇرگەن جاھاندىق داعدارىس ءوزىنىڭ لاتەنتتى كەزەڭىنەن گيپەرداعدارىس تۇرىندە اشىق كەزەڭىنە اۋىسسا نە بولادى؟ بۇل سۇراققا جاۋاپتى ەكونوميكالىق عىلىم مەن الەمدىك عىلىمي كوزقاراس بەرە الار ەدى. وسى ورايدا ءبىز حالىقارالىق فورۋمداردى، ونىڭ ىشىندە استانا ەكونوميكالىق فورۋمىن وتكىزۋدەمىز»، - دەدى ەلباسى.
بۇل تۇرعىدا ن. نازاربايەۆ قازىردەن باستاپ بولاشاقتا داعدارىسقا جول بەرمەۋدىڭ قادامدارىن ويلاستىرۋعا شاقىردى.
«الەمدىك عىلىمنىڭ ۇزدىك وكىلدەرىمەن بىرلەسە ءتونۋى مۇمكىن اپاتتاردان ءبىزدىڭ ەلدەر مەن حالىقتاردى ساقتاپ قالۋدىڭ جولدارىن تابۋعا مىندەتتىمىز»، - دەپ اتاپ ءوتتى پرەزيدەنت.
اۆتور: رۋسلان عابباسوۆ
