الماتىدا « ءتۇبى ءبىر تۇركىمىز» فەستيۆالى ءوتتى - فوتو
مادەني شارا قازاق حاندىعىنىڭ 550 جىلدىعى مەن قازاقستان حالقى اسسامبلەياسىنىڭ 20 جىلدىعىنا وراي ۇيىمداستىرىلدى.
وسىمەن سەگىزىنشى رەت وتكىزىلىپ وتىرعان ءداستۇرلى فەستيۆالدىڭ وتكىزىلۋ ماقساتى - تۇركى تانۋ جانە ءتىل تاريحى كۋرسى بويىنشا وقيتىن ستۋدەنتتەردىڭ ۋنيۆەرسيتەت قابىرعاسىندا العان بىلىمدەرىن ەتنومادەني تۇرعىدا قاۋىمعا تانىستىرۋ، تۇركى حالىقتارىنىڭ ءتىلىن، تاريحىن، رۋحاني قۇندىلىقتارىن، جازبا ءداستۇرىن، ادەت- عۇرىپتارى مەن دۇنيەتانىمىن دۇرىس ءتۇسىنىپ، قادىرلەپ، قۇرمەتتەي بىلۋگە ۇيرەتۋ بولىپ تابىلادى.
فەستيۆال قىزدار ۋنيۆەرسيتەتى ستۋدەنتتەرى مەن وقىتۋشىلارىنان قۇرالعان ۇلت- اسپاپتار وركەسترىنىڭ ورىنداۋىنداعى «شاتتىق وتانى» كۇيىمەن جانە مىڭداعان شاقىرىم جەر باسىپ كەلگەن تۇرىك ەلى ونەرپازدارىنىڭ كونتسەرتتىك باعدارلاماسىمەن اشىلدى.
«تانىسايىق ءسىز بەن ءبىز» ، «اتا سالتىم - اسىل قازىنام» اتتى ەكى بولىمنەن تۇرعان فەستيۆالدىڭ ءبىرىنشى بولىمىندە تۇرىك، قىرعىز، وزبەك، باشقۇرت، ءازىربايجان سىندى تۇركى حالىقتارىنىڭ ۇلتتىق ءان، بيلەرى ورىندالسا، ەكىنشى بولىمدە تۇركى الەمىندەگى ءار جۇرتتىڭ ادەت- عۇرپى، سالت- ءداستۇرى كورسەتىلدى. اتاپ ايتقاندا، تۇركى جۇرتىنا ورتاق «شىلدەحانا، بەسىك توي» ، «ناۋرىز» ، «باستاڭعى» ، «سابانتوي» ، «سۇندەت توي» ، «قىنا گەدجەسى» ، «كەلىن ءتۇسىرۋ، بەتاشار تويى» قويىلىمدارى ساحنالاندى.
فەستيۆال بارىسىندا سونىمەن قاتار، «حالىقتار دوستىعى» ءبيى، تۇركى الەمى جاستارىنىڭ «ۇلى دالا ۇلانىمىز» ءانۇرانى ورىندالدى.
«قىزدار ۋنيۆەرسيتەتىنىڭ ستۋدەنتتەرى وقۋ ورنىندا اعىلشىن تىلىمەن قاتار، كورەي، قىتاي، فرانسۋز، پارسى، اراب، تۇركى تىلدەرىن وقيدى. ءبىر سوزبەن ايتقاندا، فيلولوگ قىزدارىمىز ءوز ماماندىقتارىنىڭ قىر- سىرىمەن قاتار، ءتۇبى ءبىر تۇركى جۇرتىنىڭ بارلىق تىلدەرىن ءبىلىپ شىعادى. ال، بۇگىنگى شاراعا كەلەتىن بولساق، بيىلعى فەستيۆال قازاق حاندىعىنىڭ 550 -جىلدىعى مەن قازاقستان حالقى اسسامبلەياسىنىڭ 20 جىلدىعىنا وراي وتكىزىلدى. جىل سايىن وتكىزىلىپ كەلە جاتقان، داستۇرگە اينالعان شارا بۇگىنگى ۇرپاققا ءتۇبى ءبىر تۇركى جۇرتىنىڭ مادەنيەتىن، تاريحىن، سالت- ءداستۇرىن، ءتىلىن ناسيحاتتاي وتىرا بىرلىككە شاقىرۋ، ۇلتتار اراسىنداعى ىنتىماقتاستىقتى، باۋىرلاستىقتى ودان ءارى نىعايتۋ ماقساتىندا وتكىزىلىپ كەلەدى» ، دەدى اتالمىش شارا ۇيىمداستىرۋشىلارىنىڭ ءبىرى، قازاق ءتىل ءبىلىمى كافەدراسىنىڭ مەڭگەرۋشىسى، پروفەسسور تىنىشتىق ەرمەكوۆا.
ۇزدىك ونەر كورسەتكەندەر ءبىلىم ورداسىنىڭ، نييدە ۋنيۆەرسيتەتىنىڭ جانە تۇركى حالىقتارى مادەني قورىنىڭ ارنايى باعالى سىيلىقتارىمەن، ماقتاۋ قاعازدارىمەن ماراپاتتالدى.
ايتا كەتەيىك، مامىردىڭ 20 سى كۇنى باستالعان سيمپوزيۋم جۇمىسىنا ت م د ەلدەرى مەن تۇركيا، ا ق ش، قىتاي، كورەيا، نيدەرلاندى، سەربيا سىندى الەمنىڭ 20 عا جۋىق مەملەكەتى مەن قازاقستاننىڭ بارلىق ايماعىنان 500 دەن استام تۇركى تانۋ عىلىمىمەن اينالىساتىن عالىمدار قاتىستى.
