الماتى تۇرعىنى جوق كولىگى ءۇشىن ءبىر جارىم ميلليون تەڭگە سالىق تولەمەك
تابىلار دەگەن ءۇمىتى ۇزىلمەي، يەسى كولىكتى مەملەكەتتىك تىركەۋدەن دە شىعارماعان. الايدا قۇزىرلى ورىندار قوزعالعان قىلمىستىق ءىستى دە، ارىز-شاعىمداردى ەسكەرمەستەن ونى سالىق تولەۋگە مىندەتتەگەن. باعالى كولىگىنەن ايىرىلىپ، جوق كولىگى ءۇشىن سالىق تولەۋگە ءماجبۇر بولعان جابىرلەنۋشى سوت تورەلىگىنە جۇگىنىپتى.
الماتى قالاسىنىڭ المالى اۋداندىق سوتى وزگەشە ءىستى قارادى. تۇرعىنداردىڭ ءبىرى 2009-جىلى جاڭا جىل كۇنى ۇرلانعان قۇنى 13 ميلليون تەڭگە تۇراتىن لەكسۋس ماركالى اۆتوكولىگى ءۇشىن سالىق باسقارماسىنا ءبىر جارىم ميلليون تەڭگە بەرەشەك بولىپ قالعان.
الايدا جابىرلەنۋشى قىلمىس بولعان كۇنى ىشكى ىستەر باسقارماسىنا ارىز جازىپ، كولىگى ۇرلانعانىن ايتقان. قىلمىستىق ءىس قوزعاعان قالالىق ىشكى ىستەر باسقارماسى كىنالى تۇلعالار انىقتالمادى دەپ ءىستى توقتاتىپتى. ءبىراق قولدى بولعان كولىكتىڭ جىل سايىنعى سالىعى وسىمىمەن قوسا جينالا بەرگەن.
«سالىق باسقارماسىندا ول كولىكتىڭ ۇرلانعانى تۋرالى مالىمەت بار. ىشكى ىستەر دەپارتامەنتىندە بار. ەسەپكە الۋ كارتوچكاسىندا دا ونداي مالىمەت تۇر. ياعني، ۇرلانا سالىسىمەن كولىكتىڭ ۇرلانعانى تۋرالى مالىمەت ول كارتوچكاعا ەنگەن»، - دەيدى قورعاۋشى نۇرزاعي قۇدابايەۆا.
شەتەلدىك قىمبات كولىگىنەن ايىرىلعان الماتىلىق سالىق تولەۋگە مىندەتتەگەن مەكەمەنى دە، كولىكتى ەسەپتەن شىعارا المايتىنىن ايتقان ىشكى ىستەر باسقارماسىن دا سوتقا بەرگەن. سوت بارىسىندا جاۋاپكەر تاراپتار شاعىم زاڭسىز دەگەن پىكىردەن تانبادى.
كولىكتى مەملەكەتتىك تىركەۋدەن شىعارۋ ءۇشىن سالىق تولەنۋ كەرەك. ال جابىرلەنۋشى التى جىلداي پايدالانباعان كولىگى ءۇشىن سالىق تولەۋگە قارسى. سالىق باسقارماسىنىڭ وكىلدەرى بازادا تۇرعان اۆتوكولىك ءۇشىن جىل سايىنعى سالىقتى ەسەپتەي بەرەتىندەرىن ايتادى.
سوت وتىرىسى بارىسىندا سالىق باسقارماسىنىڭ وكىلدەرى ۇرلانعان كولىك يەسىنە جىل سايىن حابارلاما جىبەردىك دەسە، شاعىمدانۋشى بىردە-ءبىر مالىمەت الماعانىن ايتادى. كولىك يەسىن تەك ءبىر جاعدايدا سالىقتىق مىندەتتەن بوساتۋ قاراستىرىلعان ەكەن.
«مەملەكەتتىك تىركەۋدەن شىعارىلعان كەزدە عانا ماشينا سالىقتان بوساتىلادى. ياعني، قۇزىرلى مەكەمە، ىشكى ىستەر دەپارتامەنتىندە ول تىركەۋدەن شەشىلسە، سول ۋاقىتتان باستاپ سالىق توقتاتىلادى»، - دەدى الماتى قالاسى مەدەۋ اۋداندىق مەملەكەتتىك كىرىستەر باسقارماسىنىڭ مامانى سانجار سىرعابايەۆ.
بەيرەسمي مالىمەتتەر بويىنشا الماتىدا سالىعى تولەنبەگەن، ءبىراق ۇرلانعان كولىكتەر سانى 20 مىڭعا جۋىق ەكەن. سوت وتىرىسى دا شاعىمدانۋشىنىڭ تالابىن قاناعاتتاندىرمادى. بۇنى زاڭداعى ولقىلىققا بالاعان جەڭىلگەن تاراپ وڭ ناتيجەگە قول جەتكىزۋ ماقساتىندا سوتتىڭ كەلەسى ينستانتسيالارىنا شاعىمدانباق.
«31- ارنا»
