الەمدەگى ەڭ باي سپورتشى
2 - مامىردا لاس- ۆەگاستا بۇگىنگى تاڭداعى تورتكۇل دۇنيەنىڭ تەڭدەسسىز قوس بوكسشىسى - امەريكالىق فلويد مەيۆەزەر مەن فيليپپيندىك مەنني پاكياونىڭ كۇش سىناسقانى بەلگىلى. ايتۋلى باسەكە «عاسىر جەكپە- جەگى» دەگەن اتاۋعا يە بولدى. كوپشىلىكتىڭ پايىمداۋىنشا، بۇل كەزدەسۋ كورەرمەندەر كوڭىلىنەن شىقپادى. شارشى الاڭعا كوتەرىلگەن قوس مىقتى وزدەرىنىڭ شەبەرلىكتەرىن پاش ەتە العان جوق. مىنە، جانكۇيەرلەر اراسىندا وسى ىسپەتتەس اڭگىمەلەر قازىرگى كەزدە ءجيى ايتىلۋدا.
ءيا، بۇل پىكىرمەن تولىقتاي كەلىسەمىز. ءبىراق ودان مەيۆەزەر مەن پاكياو ەش ۇتىلعان جوق. ەكەۋىنىڭ دە ەسەبى تۇگەل. ماسەلەن، وسى جەكپە- جەككە شىعۋعا كەلىسىم بەرگەنى ءۇشىن عانا ولاردىڭ ەسەپ- شوتىنا مول كولەمدە قارجى اۋدارىلدى. ونىڭ سىرتىندا ترانسلياتسيادان، بيلەت ساتۋدان، جارنامادان تۇسكەن قىرۋار قارجى تاعى بار. بارلىعىن قوسا ەسەپتەگەندە 250 ميلليون دوللاردى قالتاعا باسقان فلويد مەيۆەزەر الەمدەگى ەڭ باي سپورتشىلاردىڭ كوشىن باستادى. ال 150 ميلليوندى يەمدەنگەن مەنني پاكياو اۋقاتتىلار تىزىمىندە ەكىنشى ورىنعا تابان تىرەدى.
داۋلەتى تاسىعان سپورتشىلار تىزىمىندە ءۇشىنشى جانە ءتورتىنشى ورىن تەڭبىل دوپ ونەرىنىڭ تەڭدەسسىزدەرى - ليونەل مەسسي مەن كريشتيانۋ رونالدۋعا تيەسىلى. «بارسەلونانىڭ» بەتكەۇستارىنا اينالعان ارگەنتينالىق سۇرمەرگەن 56,3 ميلليوندى ەنشىلەسە، «رەالدىڭ» ساپىندا جاسىنداي جارقىراپ جۇرگەن پورتۋگاليالىق شابۋىلشى 50,2 ميلليوندى يەلەندى.
بەسىنشى جانە التىنشى ساتىعا «فورمۋلا-1» سپورتىنىڭ وكىلدەرى جايعاستى. ولار - گەرمانيالىق سەباستيان فەتتەل مەن يسپانيالىق فەرناندو الونسو. ءبىرى - 50, ەكىنشىسى 40 ميلليون ا ق ش دوللارى كولەمىندە تابىس تاپتى. جەتىنشى ورىندا - پ س ج كلۋبى ساپىندا ونەر كورسەتىپ جۇرگەن شۆەتسيالىق فۋتبولشى زلاتان يبراگيموۆيچ. «يبرانىڭ» تابىسى - 35,1 ميلليون. سەگىز جانە توعىزىنشى ورىندار «فورمۋلا -1» سايىسىندا «مەرسەدەس» كولىگىن تىزگىندەگەن بريتانيالىق ليۋيس حەميلتون مەن امەريكالىق بەيسبولشى كلەيتون كەرشوۋعا بۇيىردى. ولاردىڭ تابىستارى بىردەي - 31 ميلليون. ۇزدىك وندىقتىڭ قاتارىنا ا ق ش- تىڭ تاعى ءبىر بەيسبولشىسى جاستين ۆەلاندەر بار. ول 28 ميلليوندى قالتاعا باستى.
عالىم سۇلەيمەن
«ايقىن»
