تالدىقورعاندا مادەنيەت جانە ونەر سالاسىنىڭ ۇزدىك قىزمەتكەرلەرى ماراپاتتالدى - فوتو
ال ب. ريموۆا اتىنداعى وبلىستىق دراما تەاترى «ۇزدىك وبلىستىق مادەنيەت مەكەمەسى» نوميناتسياسىندا جەڭىمپاز دەپ تانىلىپ، ولارعا «ۋاز» اۆتوكولىگى تابىس ەتىلدى.
اتالعان شارا تالدىقورعان قالاسىنداعى ءى. جانسۇگىروۆ اتىنداعى مادەنيەت سارايىندا وتكىزىلدى، دەپ حابارلايدى الماتى وبلىسى اكىمدىگىنىڭ باسپا ءسوز قىزمەتىنەن.
سالتاناتتى شارانىڭ اشىلۋ راسىمىندە وبلىس اكىمىنىڭ ورىنباسارى باقتيار ونەربايەۆ قۇتتىقتاۋ ءسوز سويلەپ، وبلىستىڭ مادەنيەت جانە ونەر سالاسىندا جەتكەن جەتىستىكتەرىنە، ۇ و س- تاعى جەڭىستىڭ 70 جىلدىعى، قازاق حاندىعىنىڭ 550 جىلدىعى، ق ر كونستيتۋتسياسى مەن قازاقستان حالقى اسسامبلەيالارىنىڭ 20 جىلدىعى سىندى ايتۋلى داتالاردىڭ اتالىپ ءوتۋ بارىسىنا توقتالدى.
كەلەسى كەزەكتە وبلىس اكىمىنىڭ ورىنباسارى ب. ونەربايەۆ مادەنيەت جانە ونەر سالاسىندا بەلسەندىلىك تانىتقان ءبىرقاتار ازاماتتارعا «مادەنيەت سالاسىنىڭ ۇزدىگى» توسبەلگىسىن تابىس ەتتى. اتالعان ماراپاتقا «تالدىقورعان اۋەندەرى» فولكلورلىق-ەتنوگرافيالىق ءانسامبلىنىڭ ءانشىسى ارافات يسكاكوۆ پەن وبلىستىق حالىق شىعارماشىلىعى ورتالىعى ديرەكتورىنىڭ ورىنباسارى ءسابيتوۆا ايگۇل يە بولدى.
بۇدان بولەك ماراپاتتاۋ ءراسىمى 16 نوميناتسيا بويىنشا جۇرگىزىلدى، ولار: «ۇزدىك اۋداندىق مادەنيەت ءۇيى»، «ۇزدىك ءانشى»، «ۇزدىك اۋىلدىق كىتاپحانا»، «ۇزدىك اكتەر»، «ۇزدىك ءبيشى» جانە ت. ب. «ۇزدىك مادەنيەت قىزمەتكەرى» نوميناتسياسىندا وبلىستىق شىعارماشىلىق ورتالىعىنىڭ قىزمەتكەرى اسقار نۇرمۇحامبەتوۆ جەڭىمپاز دەپ تانىلسا، «سازگەن» ءانسامبلىنىڭ مۋزىكانتى تالعات ورازايەۆ «ۇزدىك اسپاپشى» نوميناتسياسىندا جۇلدەگەر اتاندى. ال الاكول اۋداندىق كىتاپحانا ۇجىمى «ۇزدىك اۋداندىق كىتاپحانا» نوميناتسياسىنا قول جەتكىزدى. سونىمەن قاتار «ۇزدىك اكتەر» نوميناتسياسى بويىنشا ب. ريموۆا اتىنداعى وبلىستىق دراما تەاترىنىڭ اكتەرى اباي نۇعىمانوۆ باس جۇلدەگە يە بولسا، «ۇزدىك حالىق تەاترى» نوميناتسياسى بويىنشا پانفيلوۆ اۋداندىق د. راقىشيەۆ اتىنداعى تەاتر ۇجىمى جەڭىمپاز دەپ تانىلدى. جەڭىمپازداردىڭ ءارقايسىسىنا ەسكەرتكىش سىيلىقتار، ديپلومدار مەن 100 مىڭ تەڭگەنىڭ سەرتيفيكاتتارى تابىس ەتىلدى.
سالتاناتتى شارا سوڭى مەرەكەلىك كونسەرتپەن اياقتالدى.
