قازاقستاندا مەملەكەتتىك قىزمەتتەردىڭ ءبىرىڭعاي پروۆايدەرى بولاتىن ارنايى كورپوراتسيا قۇرىلادى
بۇل تۋرالى بۇگىن استانا ەكونوميكالىق فورۋمىندا ق ر ينۆەستيتسيالار جانە دامۋ مينيسترلىگى بايلانىس، اقپاراتتاندىرۋ جانە اقپارات كوميتەتىنىڭ ءتوراعاسى ساكەن سارسەنوۆ ءمالىم ەتتى.
«ءبىز مەملەكەتتىك قىزمەتتەردىڭ ءبىرىڭعاي پروۆايدەرى بولاتىن مەملەكەتتىك كورپوراتسيا قۇرامىز. بۇل كانادا مەن اۆستراليا ەلدەرىنىڭ تاجىريبەسى. قازاقستان ازاماتتارى بارلىق مەملەكەتتىك قىزمەتتەردى ءبىر جەردەن الاتىن بولادى. سونىمەن قاتار ءبىز ۇكىمەتتىڭ تولىقتاي اشىق بولۋىن قامتاماسىز ەتەمىز. ۇكىمەت مەملەكەتتىك قۇپيالاردان بولەك، ءوز قىزمەتىنىڭ بارلىق مالىمەتتەرىن ۇسىنادى. سونىمەن قاتار ورتالىق مەملەكەتتىك ورگانداردىڭ ستاتيستيكالىق مالىمەتتەرى ونلاين رەجىمدە قولجەتىمدى بولادى»، - دەدى ول.
ونىڭ ايتۋىنشا، ەلباسىنىڭ «100 ناقتى قادام» باعدارلاماسىندا ءبىرىڭعاي قىزمەتتەر ۇسىناتىن كورپوراتسيا قۇرۋ جونىندە تاپسىرما بەرىلگەن. ول حالىققا قىزمەت كورسەتۋ ورتالىقتارى بازاسىندا قۇرىلماق.
«وندا مەملەكەتتىك قىزمەتتەر ۇسىناتىن بارلىق ۇيىمدار توپتاستىرىلاتىن بولادى. بارلىق مەملەكەتتىك قىزمەتتەردى وسى كورپوراتسيا ۇسىنادى. ازاماتتار تەك ءبىر جەرگە بارىپ، وزىنە قاجەتتى قىزمەتتى الا الادى»، - دەدى س. سارسەنوۆ.
«وسىلايشا، ءبىز مەملەكەتتىك ورگانداردىڭ اشىقتىعىن قامتاماسىز ەتەمىز. بۇل ءوز كەزەگىندە مەملەكەتتىك ساياساتتى قالىپتاستىرۋ كەزىندە ازاماتتاردىڭ بەلسەندى اتسالىسۋىنا سەپتىگىن تيگىزەدى. بۇگىندە اشىق مالىمەتتەر پورتالى جۇمىس ىستەپ جاتىر. كولىك، قاۋىپسىزدىك، مەديتسينا، ءبىلىم بەرۋ، الەۋمەتتىك قورعاۋ سالالارى بويىنشا 219 مالىمەتتەر توبى ۇسىنىلعان»، - دەپ اتاپ ءوتتى ول.
اۆتور: جاسۇلان جولدىبايەۆ
