استانا قالاسىنىڭ اكىمدىگى تۇرعىنداردى باسپانالارىن ساتۋعا قۇقىعى جوق قۇرىلىس كومپانيالارى تۋرالى حاباردار ەتتى

استانا. قازاقپارات - استانا قالاسىنىڭ اكىمدىگى «ال باراكات كومپاني» ج ش س قۇرىلىس كومپانياسىنا قاتىستى ءمان-جايدان حاباردار ەتتى.

«تۇسەتىن وتىنىشتەرگە بايلانىستى استانا قالاسىنىڭ اكىمدىگى قالا تۇرعىندارىنا قازىرگى ۋاقىتتا «ال باراكات كومپاني» ج ش س استانا قالاسىنداعى قۇرىلىسى باستالماعان «تەنگيز»، «توكيو»، «شاردجا» جانە زاڭسىز قۇرىلىس جۇرگىزۋ فاكتىلەرىنە ءتيىستى قىلمىستىق ءىس قوزعالۋى سەبەپتى قۇرىلىس جۇمىستارى توقتاتىلعان «پراگا» تۇرعىن ءۇي كەشەندەرىندە باسپانالاردى ساتۋدى جالعاستىرۋدا ەكەنىن حابارلايدى.

كومپانيانىڭ اتالعان تۇرعىن ءۇي كەشەندەرىنىڭ قۇرىلىسىن جۇرگىزۋگە رۇقسات قۇجاتتارى جوق («پراگا» ت ۇ ك جانە باسقا) جانە ۇلەسكەرلەردىڭ قارجىسىن تارتۋعا جانە باسپانالاردى ساتۋعا قۇقىق بەرەتىن ليتسەنزياسى جوق»، دەپ حابارلايدى astana.gov.kz.

قازىرگى ۋاقىتتا «تولەندى» ت ۇ ك («اقمول جىلۋ سەرۆيس» ج ش س) «انيسا» ت ۇ ك، «انيسا 2»، «انيسا 3»، «تەلمان» ت ۇ ك، تىلەنديەۆ داڭعىلى بويىنداعى ت ۇ ك، «ستوليچنىي 2» ت ۇ ك جانە «ابات» ت ۇ ك نىساندارىنىڭ قۇرىلىسى رۇقسات قۇجاتتارىنىڭ بولماۋىنا بايلانىستى توقتاتىلعان (مەملەكەتتىك ساراپتامانىڭ قورىتىندىلارى جانە قۇرىلىس جۇرگىزۋگە قاۋلىنىڭ بولماۋى، «ستوليچنىي 2» ت ۇ ك- ىنەن باسقا). سونىمەن قوسا، بۇل كومپانيانىڭ ۇلەسكەرلەردىڭ قارجىسىن تارتۋعا ليتسەنزياسى جوق.

نىساندار قۇرىلىسى رۇقسات قۇجاتتارى تولىق دايىن بولعاننان كەيىن قايتا جۇرگىزىلەتىن بولادى.

ال «سوزۆەزديە» تۇرعىن ءۇي كەشەنىنە قاراجات سالعان ينۆەستورلاردىڭ وتىنىشتەرىنە بايلانىستى بۇل نىساندى سالۋشى «قازمۇناي قۇرىلىس سەرۆيس zk» ج ش س بولىپ تابىلاتىنىن جانە تۇرعىن ءۇي كەشەنىنىڭ قۇرىلىسى رۇقسات قۇجاتتارىنسىز باستالعانىن، باسپانالاردى ساتۋ ۇلەسكەرلەردىڭ قارجىسىن تارتۋعا ليتسەنزياسىز جۇزەگە اسىرىلعانىن حابارلايمىز»، دەلىنگەن اكىمدىك حابارلاماسىندا.

بۇل دەرەكتەر بويىنشا اقپارات استانا قالاسى بويىنشا مەملەكەتتىك كىرىستەر دەپارتامەنتىنە ق ر زاڭناماسىمەن بەلگىلەنگەن تارتىپتە شەشىم قابىلداۋ ءۇشىن جىبەرىلدى.

«سونىمەن قاتار «ورال ديزاين ستروي سەرۆيس» ج ش س «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭعا قايشى «كرىشا. kz» سايتىندا حابارلاندىرۋ ورنالاستىرۋ ارقىلى تۇرعىن ۇيلەردى زاڭسىز ساتۋمەن اينالىساتىنىن حابارلايمىز. «ورال ديزاين ستروي سەرۆيس» ج ش س رۇقسات قۇجاتتارىنسىز قوسىمشا بىرنەشە قاباتتى ءوز بەتىنشە سالعان. قولدا بار اقپاراتقا سايكەس، تۇرۋعا جارامدى بوس ورىندار جوق. وسىعان وراي، «ورال ديزاين ستروي سەرۆيس» ج ش س ديرەكتورى ق. جۇمابەكوۆقا قاتىستى الاياقتىق فاكتىسى بويىنشا قىلمىستىق ءىس قوزعالدى. قازىرگى ۋاقىتتا تۇرعىن ءۇيدىڭ قۇرىلىسى توقتاتىلدى. تەرگەۋ جۇمىستارىنىڭ قورىتىندىسى نەگىزىندە قۇرىلىستى جالعاستىرۋ بويىنشا شەشىم قابىلداناتىن بولادى»، دەلىنگەن استانا قالاسى اكىمدىگىنىڭ مالىمەتىندە.

استانا قالاسىنىڭ اكىمدىگى قالا تۇرعىندارىنا تۇرعىن ءۇي الۋ كەزىندە ق ر ساۋلەت، قالا قۇرىلىسى جانە قۇرىلىس قىزمەتى تۋرالى زاڭىن جانە تۇرعىن ءۇي قۇرىلىسىنا ۇلەستىك قاتىسۋ تۋرالى زاڭدى نەگىزگە الا وتىرىپ، كەلىسىمشارت جاساۋعا كەڭەس بەرەدى. تۇرعىنداردان بۇل ماسەلەگە قاتىستى بارلىق سۇراقتار بويىنشا اكىمدىكتىڭ  «astana.kz»  سايتىنا حابارلاسۋلارى سۇرالادى.