قازاقستان حالىقارالىق ەڭبەك ۇيىمىمەن ىنتىماقتاستىققا ەرەكشە ماڭىز بەرەدى

استانا. قازاقپارات - اقوردادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆا حالىقارالىق ەڭبەك ۇيىمىنىڭ شىعىس ەۋروپا جانە ورتالىق ازيا ەلدەرىنە ارنالعان وڭىرلىك بيۋروسىنىڭ ديرەكتورى حاينتس كوللەرمەن كەزدەستى.

گ. ءابدىقالىقوۆا حالىقارالىق ەڭبەك ۇيىمىنىڭ (ح ە ۇ) ب ۇ ۇ جۇيەسىندەگى ەڭبەك قاتىناستارىن رەتتەۋ ماسەلەلەرى جونىندەگى حالىقارالىق بەدەلدى ۇيىم رەتىندەگى ءرولىن اتاپ ءوتتى. مەملەكەتتىك حاتشى قازاقستاننىڭ بۇل حالىقارالىق ۇيىممەن ىنتىماقتاستىققا ايرىقشا ءمان بەرەتىنىن جانە ح ە ۇ- نىڭ نەگىزگى ءىس- شارالارىنا جىل سايىن بەلسەندى تۇردە قاتىساتىنىن اتاپ كورسەتتى. سونىڭ ىشىندە بيىلعى ماۋسىمدا وتەتىن ح ە ۇ باس كونفەرەنتسياسىنىڭ 104-سەسسياسىنىڭ تاقىرىبى ماڭىزدى ەكەنىنە ەرەكشە توقتالدى.

اقوردانىڭ باسپا ءسوز قىزمەتىنىڭ حابارلاۋىنشا، سونىمەن قاتار، تاراپتار ەڭبەك قاتىناستارى سالاسىنداعى قازاقستان مەن حەۇ ىنتىماقتاستىعىنىڭ كەلەشەگىن تالقىلادى.

مەملەكەتتىك حاتشى مەملەكەت باسشىسى ۇسىنعان بەس ينستيتۋتسيونالدىق رەفورما مەملەكەتتىك ينستيتۋتتاردى ساپالى جاڭارتۋعا، ەكونوميكالىق باعدارلامالاردىڭ تيىمدىلىگىن ارتتىرۋعا، مەملەكەتتىك قىزمەتتەر ساپاسىن جاقسارتۋعا جانە كەڭ اۋقىمدى ينفراقۇرىلىمدىق جوبالاردى جۇزەگە اسىرۋعا باعىتتالعانىن اتاپ كورسەتتى.

گ. ءابدىقالىقوۆا «نۇرلى جول» مەملەكەتتىك باعدارلاماسى ەكونوميكانىڭ ورنىقتى ءوسۋىن قامتاماسىز ەتۋ، بۇگىنگى جۇمىس ورىندارىن ساقتاۋ جانە سىرتقى نارىقتاعى احۋالدىڭ ناشارلاۋى جاعدايىندا جاڭالارىن اشۋ ءۇشىن ەرەكشە مانگە يە ەكەنىن ايتتى. اتالعان مىندەتتەردى ىسكە اسىرۋ ەل ەكونوميكاسىن جانداندىرادى، يكەمدىلىكتى ارتتىرادى جانە حالىقتىڭ جۇمىسپەن قامتىلۋىن بارىنشا قامتاماسىز ەتە وتىرىپ، كاسىپكەرلىك پروبلەمالارىنىڭ شەشىلۋىنە مۇمكىندىك تۋعىزادى.

كەزدەسۋ بارىسىندا سونىمەن بىرگە قازاقستاندا جاستاردى جۇمىسپەن قامتاماسىز ەتۋ ءۇشىن ۇلتتىق ءىس- قيمىل جوسپارىن قابىلداۋ، سونداي- اق ەڭبەكتى قورعاۋ جانە جۇمىس كۇشىنىڭ يكەمدىلىگى جونىندە زەرتتەۋ جۇرگىزۋدىڭ ۇلتتىق باعدارىن ازىرلەۋ جونىندە ح ە ۇ- نىڭ تەحنيكالىق قولداۋ كورسەتۋى ماسەلەلەرى قارالدى.

 

اۆتور: قانات مامەتقازى  ۇلى