قابيبوللا جاقىپوۆ نيدەرلاندى پرەمەر-مينيسترىمەن كەزدەستى

استانا. قازاقپارات - نيدەرلاندى كورولدىعىندا ءىس ساپارمەن جۇرگەن ءماجىلىس ءتوراعاسى قابيبوللا جاقىپوۆ كورولدىقتىڭ پرەمەر-ءمينيسترى مارك ريۋتتەمەن كەزدەستى. بۇل تۋرالى ق ر پارلامەنتى ءماجىلىسى اپپاراتىنىڭ باسپا ءسوز قىزمەتىنەن حابارلادى.

جۇزدەسۋدەگى اڭگىمەنىڭ باستى تاقىرىبى - ب ۇ ۇ قاۋىپسىزدىك كەڭەسىنە قازاقستاننىڭ كانديداتۋراسىن 2017-2018-جىلدارعا تۇراقتى ەمەس مۇشەلىككە ۇسىنۋ بولدى.

ءماجىلىس ءتوراعاسى قازاقستان پرەزيدەنتىنىڭ ارنايى ەلشىسى رەتىندە مارك ريۋتتەگە مەملەكەت باسشىسى نۇرسۇلتان نازاربايەۆتىڭ ب ۇ ۇ قاۋىپسىزدىك كەڭەسىنە ەلىمىزدىڭ كانديداتۋراسىن 2017-2018-جىلدارعا تۇراقتى ەمەس مۇشەلىككە ۇسىنعاندا قولداۋ ءبىلدىرۋىن وتىنگەن حاتىن تابىستادى.

سونداي-اق، ق. جاقىپوۆ ب ۇ ۇ قاۋىپسىزدىك كەڭەسىنىڭ قۇرامىنا ەلىمىزدى العان جاعدايدا، قازاقستان قازىرگى تاڭدا وزەكتى بولىپ وتىرعان ماسەلەلەردىڭ شەشىمىن تابۋعا كۇش سالاتىنىن اتاپ ءوتتى. سونىمەن بىرگە ازىق-تۇلىك، سۋ جانە ەنەرگەتيكالىق قاۋىپسىزدىك پەن يادرولىق تاراتپاۋ ماسەلەلەرىندە باسىمدىق بولاتىنى ەسكەرىلدى.