قازاقستاندا جالعان اقشا جاساۋ فاكتىلەرى ازايماي تۇر

استانا. قازاقپارات - قازاقستاندا كولەڭكەلى ەكونوميكاداعى قىلمىستار سانى بويىنشا جالعان اقشا جاساۋ فاكتىلەرى ءبىرىنشى ورىندا تۇر.

بۇل تۋرالى بۇگىن قارجى مينيسترلىگى مەملەكەتتىك كىرىستەر كوميتەتىندە وتكەن بريفينگ بارىسىندا ق م مەملەكەتتىك كىرىستەر كوميتەتى باسقارما باسشىسىنىڭ ورىنباسارى ابزال بايمانوۆ ءمالىم ەتتى، دەپ حابارلايدى BNews.kz ءتىلشىسى.

«رەسپۋبليكا بويىنشا بيىلعى جىلدىڭ ءۇش ايىندا كولەڭكەلى ەكونوميكا سالاسىندا 1311 قىلمىس جاسالعان. ونىڭ ىشىندە، جالعان كاسىپكەرلىك بويىنشا 306 قىلمىس، سالىق تولەۋدەن جالتارعان 147 قىلمىس، ەكونوميكالىق كونترابانداعا قاتىستى 96 قىلمىس، مۇناي جانە مۇناي ونىمدەرىن زاڭسىز ساقتاۋ بويىنشا 25 قىلمىس، الكوگولدى ءونىمنىڭ زاڭسىز اينالىمى بويىنشا 72 قىلمىس، زاڭسىز ويىن بيزنەسى بويىنشا 85 قىلمىس، جالعان اقشا جاساۋعا قاتىستى 580 قىلمىس تىركەلگەن»، - دەيدى ا. بايمانوۆ.

كوميتەت باسشىسىنىڭ ورىنباسارى اتاپ وتكەندەي، كولەڭكەلى ەكونوميكامەن كۇرەستە جالعان كاسىپكەرلىك پەن جالعان اقشا جاساۋ فاكتىلەرىمەن كۇرەس كۇشەيگەن.

كەنجەكەي توقتامۇرات