18:58, 20 - مامىر 2015 | GMT +5
مينسكتە «بارلىعىنا ورتاق جەڭىس. قازاقستان - بەلارۋس» كىتابىنىڭ تۇساۋكەسەرى ءوتتى
استانا. قازاقپارات - قازاقستاننىڭ بەلارۋستەگى ەلشىلىگى ۇلى وتان سوعىسىنىڭ تاريحى مۇراجايىندا سوعىس كەزىندە بەلارۋستە شايقاسقان قازاقستاندىقتار تۋرالى كىتاپتى تانىستىردى.
«بارلىعىنا ورتاق جەڭىس. قازاقستان - بەلارۋس» كىتابى جەڭىستىڭ 70 جىلدىعىنا ارنالعان، ول «پەترۋس بروۆكا اتىنداعى بەلارۋس ەنتسيكلوپەدياسى» باسپاسىندا جارىققا شىققان، دەپ حابارلايدى بەلتا.
باسىلىمدا بەلارۋس جەرىندە سوعىسىپ، ونداعى شايقاستارى ءۇشىن كەڭەس وداعىنىڭ باتىرى اتاعىنا يە بولعان 83 قازاقستاندىق ازاماتتىڭ بيوگرافياسى مەن فوتو پورترەتتەرى بەرىلگەن. قازاقستاندىقتاردىڭ پارتيزاندىق قوزعالىسقا قاتىسۋى، ولاردىڭ 1943-1944-جىلدارى بەلارۋستى ازات ەتۋ كەزىندە تانىتقان قايسارلىعى مەن ەرلىگى تۋرالى باياندالعان. سونداي-اق بەلارۋستە قازاقستاندىق جاۋىنگەرلەرى تۋرالى ەستەلىك قالاي ماڭگى ەستە ساقتالىپ وتىرعانى سۋرەت تۇرىندە كورسەتىلگەن، فوتوسۋرەتتەردە باتىرلاردىڭ قۇرمەتىنە اتالعان مۇسىندىك ەسكەرتكىشتەر، باۋىرلاس مولالار مەن قورىمدار، كوشەلەر بەينەلەنگەن.
