جيددادان مەككەگە دەيىنگى ساپار جانە قاعبانى العاش كورگەندەگى كەرەمەت سەزىم
كيەلى مەكەنگە جول جۇرمەس بۇرىن ءبىراز ۋاقىت ىشكى دايىندىق جۇرگىزدىم. پايعامباردىڭ (وعان اللانىڭ يگىلىگى مەن سالەمى بولسىن) ءومىر جولى مەن تاعىلىمدارى تۋرالى كوپ اڭگىمەلەر وقىدىم.
«استانا- ءابۋ- دابي» باعىتى بويىنشا بەت العان Etihad Airways ۇشاعىنداعى جولسەرىك كورشىم دە جىلى ۇشىراعان اڭگىمەشىل جان بولىپ كەزىكتى. سايد - پاكىستاندىق. ساۋلەت سالاسىندا ءبىلىمى بار، استانادا تانىمال نىسانداردىڭ بىرىندە ەڭبەك ەتەدى. ءۇش ءتىلدى (اراب، ۋردۋ جانە حيندي) جاقسى مەڭگەرگەن. ءارى فرانتسۋز، نەمىس تىلدەرىن ۇيرەنىپ ءجۇر ەكەن. اعىلشىن - كوممۋنيكاتسيا قۇرالى. كەيىن بەلگىلى بولعانداي، مەدينەدە دۇنيەگە كەلگەن امىرلىك ازاماتى وتباسىمەن جانە اتا- انالارىمەن ءۇندىستاندا تۇرادى ەكەن.
سايدتىڭ پىكىرىنشە، قازاقستان - تابيعي جانە ادامي الەۋەتى جوعارى ەرەكشە ەل. استانا دامىعان ەلدىڭ جاس جۇرەگى ىسپەتتەس. ول قازاقستان شەتەلدىكتەر ءۇشىن بارىنشا اشىق بولا تۇسكەنى، جاستار ەلىنىڭ حالىقارالىق ارەنادا كەڭىنەن تانىلۋى ءۇشىن بار كۇش- جىگەرلەرىن جۇمساپ جاتقانى ءۇشىن قۋاناتانىن ايتتى.
جول بارىسىندا ءۇش رەت قاجىلىققا بارعان، 10-13 رەت ۋمرا عيباداتىن وتكەرگەن جاڭا دوسىم سايد ماعان نۇسقاۋشى بولا ءبىلدى.
« ءال- حارام مەشىتىنە بارعاندا، كىرەبەرىستە ىشىڭنەن دۇعا قايىرىپ، تابالدىرىقتان وڭ اياعىمەن اتتاپ كىر. جان- جاعىڭا قاراما، قاعبانىڭ قاي باعىتتا ەكەنىن بىلەتىن ادامنىڭ سوڭىنان ەر. «ءال- بەيت ءال- حارام» اتاۋى بار قاعبانىڭ ارابشادان اۋدارماسى «كيەلى ءۇي» . ول ءوزى باستاپ بارسىن، سەن كوزىڭدى جۇمىپ ءجۇر. قاعباعا جاقىن كەلگەندە، وعان قاراۋىڭا بولادى. بۇل ورىندى كوزبەن كورگەن كەزدە تىلسىم كۇشتىڭ تىكەلەي جۇرەگىڭە قالاي جەتكەنىن بىردەن سەزەسىڭ. مەدينەدە ماسدجيد ان- ناناۆي مەشىتىندەگى «راۋدا» باعىندا مىندەتتى تۇردە ناماز وقى. سونداي- اق پايعامباردىڭ جاقسى كورگەن «اجۋا» قۇرماسىن ساتىپ ال، - دەدى سايد، - «تاڭەرتەڭ «اجۋا» قۇرماسىمەن ورازاسىن اشقان ادام سول كۇنى پالە- جالادان ساۋ جۇرەدى» ، - دەلىنگەن حاديستەردىڭ بىرىندە.
جايلى ورىندىق، اشىق تا جارقىن اڭگىمشىل كورشىمەن بىرگە كوڭىلىمدى ەرەكشە قاناتتى سەزىم بيلەگەندەي بولدى. پيلوت ۇشاقتىڭ قونايىن دەپ جاتقانىن حابارلادى. ءابۋ- دابي حالىقارالىق تەرمينالى ءبىزدى كۇتىپ الدى. دارەتحانا، تازالىق، جۋىنۋ بولمەدەرى ءار عيباداتحانانىڭ كىرەبەرىسىندە بار. بۇل تۇسىنىكتى جايت. سەبەبى ءابۋ- دابي اۋەجايىنا جىلىنا 12 ميلليونعا دەيىن جولاۋشى قابىلداۋىنا تۋرا كەلەدى. Midfield Terminal ورتالىق تەرمينالىن ىسكە قوسقاننان كەيىن بۇل حالىقارالىق اۋەجاي جىلىنا 20 ميلليونعا دەيىن جولاۋشى قابىلداۋ مۇمكىندىگىنە يە بولادى.
نامازحاناعا توسەلگەن قالىڭ كىلەمگە جايعاسىپ، ۋمرا عيباداتىن جاساۋدىڭ العاشقى ساتىسىنا وتتىك، - يحرامعا كىرىپ، تاۋاپ جانە ساحي جاسادىق. باسقا ۋاقىتتا ىستەۋگە رۇقسات ەتىلگەن كەيبىر ءىس- ارەكەتتەر ۋمرا ۋاقىتىندا حارام بولادى. بۇل كەزدە جىنىستىق قاتىناس، ونى ەسكە الۋ، جانە سوعان الىپ باراتىن ءسۇيۋ، ايمالاۋ سەكىلدى بارلىق امالدار، اللاھقا بويسۇنباۋ جانە كۇنالى ىستەر جاساۋ، ادامدارمەن ۇرىسۋ، تالاسۋ، جانجالداسۋ، ولارعا ءتىل تيگىزۋ جانە ت. ب. تىيىم سالىنادى.
عۇسىل ءراسىمىن ورىنداعاننان كەيىن ايەلدەر اق كيىمگە ورانىپ، باستارىنا جاۋلىق تاعادى، ولاردىڭ بەتتەرى، ساۋساق ۇشتارى مەن تاباندارى عانا كورىنەدى. ەر الدامدار ەكى اق جايما ورانادى: بىرەۋى يىقتان تىزەگە دەيىن جابادى، ەكىنشى جايمانى سول يىعىنا ىلەدى. بۇل كيىم قاجىلىق ەتۋشىلەردىڭ نيەتىنىڭ تازالىعىن، ولاردىڭ اللانىڭ الدىنداعى تەڭدىگىن بىلدىرەدى.
جيددادان شىققاننان باستاپ مەككەگە دەيىنگى جول مەن قاعبانى العاش كورگەن ساتتەگى كەرەمەت اسەر جايلى كەلەسى اپتادا وقىڭىزدار.
