الماتىنىڭ قىسقى وليمپيادانى وتكىزۋ بويىنشا ءوتىنىمىن تانىستىرۋعا قازاقستاننىڭ بەلگىلى ساياسي جانە سپورت قايراتكەرلەرى قاتىسادى
بۇل تۋرالى بۇگىن الماتىدا وتكەن ارنايى باسپا ءسوز ءماسليحاتى بارىسىندا «الماتى ق. حالىقارالىق سپورت جوبالارى ديرەكتسياسى» مەملەكەتتىك قورىنىڭ ديرەكتورى يليا ورازاقوۆ مالىمدەدى.
«ۇستىمىزدەگى جىلدىڭ 10-13- ماۋسىمى ارالىعىندا حالىقارالىق وليمپيادا كوميتەتىنىڭ لوزاننا (شۆەيتساريا) قالاسىنداعى شتاب-پاتەرىندە تەحنيكالىق ەسەپ بەرۋ جيىنى وتەدى. وليمپيادانى وتكىزۋگە ۇمىتكەر - الماتى مەن بەيجىڭ قالاسىنىڭ باسشىلىعى ح و ك مۇشەلەرى الدىندا ءوز وتىنىمدەرىن تانىستىرادى. تانىستىرىلىم ينتەراكتيۆتى تارتىپتە جۇرەدى. ياعني، ح و ك مۇشەلەرى ءوتنىم جانە ويىنداردىڭ تۇجىرىمداماسى جانە باسقا دا تاقىرىپتار بويىنشا سۇراقتار قويادى. ءوتىنىم بەرۋشى تاراپتار ولارعا جان-جاقتى جاۋاپ بەرۋگە تىرىسادى»، - دەدى ي. ورازاقوۆ.
ونىڭ ايتۋىنشا، تانىستىرىلىم شاراسىنا «الماتى-2022» ۇيىمداستىرۋ كوميتەتى جانە ق ر ۇلتتىق وليمپيادا كوميتەتىنىڭ مۇشەلەرىمەن قاتار، ەلىمىزدىڭ بەلگىلى ساياسي قايراتكەرلەرى دا قاتىسادى.
«لوزاننا قالاسىنا بىزبەن بىرگە الماتى قالاسىنىڭ اكىمى احمەتجان ەسىموۆ بارادى، سونداي-اق ق ر پرەمەر-ءمينيسترىنىڭ ورىنباسارى بەردىبەك ساپاربايەۆ پەن ق ر سىرتقى ىستەر ءمينيسترى ەرلان ىدىرىسوۆ تا بارادى دەگەن ۇمىتتەمىز. سونىمەن قاتار، قازاقستان بوكس فەدەراتسياسىنىڭ پرەزيدەنتى تيمۋر قۇلىبايەۆ پەن قازاقستاننىڭ پاراليمپيادا كوميتەتىنىڭ جەتەكشىسى قايرات بورانبيەۆ تا لوزانناعا بارۋعا نيەت ءبىلدىردى. قازىر ءتىزىم ناقتىلانىپ جاتىر. ءبىز ءوزىمىزدىڭ باسىمدى جاقتارىمىزدى جاقسى بىلەمىز. اسىرەسە، ەسەپ بەرۋ وتىرىسىندا وليمپيادانى وتكىزۋگە ساياساتكەرلەر مەن مينيسترلەر تاراپىنان قولداۋ كورسەتىلىپ جاتقانىن كورسەتۋ ماڭىزدى دەپ سانايمىن»، - دەدى ي. ورازاقوۆ.
اۆتور: جاپپاربەرگەن ايبوتا
