ءاليا نازاربايەۆا كۇيەۋى، بيزنەسى جانە پرەزيدەنت اكەسى تۋرالى ايتىپ بەردى
بالالىق شاعى تۋرالى
بالا كەزىمدە مەن قىزداردىڭ ۇل بالادان ەش كەم تۇسپەيتىنىن دالەلدەگىم كەلەتىن. «پانفيلوۆسكي» كەڭشارىنا كەلگەن كەزىمىز ەسىمدە. اكەم مەنى اتقا مىنگىزگەندە قورىققانىمنان جىلقىنىڭ جالىنان ۇستاپ العان ەدىم. اكەم بولسا «جالىنان نەگە ۇستاپ العانسىڭ؟ تىزگىنىنەن ۇستا! سەن مەنىڭ قىزىمسىڭ با، جوق پا؟ ! قورىقپاۋىڭ كەرەكسىڭ» دەگەن بولاتىن. تۋرا سول ادىسپەن اكەم مەنى 5 جاسىمدا جۇزۋگە دە ۇيرەتتى. «ءجۇز!» دەپ سۋدا جىبەرە سالعاندا، امالسىزدان ءجۇزىپ كەتتىم.
قولىمنان كەلمەگەنى اڭشىلىق بولدى. ەڭ قورقىنىشىتىسى - قاباندارعا تۇنگى اڭشىلىققا شىعۋىمىز ەدى. اكەم ازىلگە باسقاندى ۇناتاتىن. ول بايقاتپاي قامىستاردى اياقتارىمەن شىقىرلاتىپ، ماعان «اباي بول، قاباندار كەز- كەلگەن جەردەن شىعا كەلەدى» دەۋمەن بولدى. مەن دىرىلدەپ، قۇمارلىق پەن قورقىنىشتى قاتار سەزىنۋمەن بولدىم. كەيىن ءبىز قاباندار جايىلعان جەرگە جەتتىك. وقتىڭ دىبىسىن ەستي سالا مەن وتىرا كەتىپ، كوزىمدى تاس جۇمىپ الدىم. باسىمدى قولىممەن بۇركەپ، ءبارى تىنىشتالعاندا عانا ورنىمنان تۇردىم. ماعان بۇل اۋىر ءتيدى. بارلىعى سونداي ادىلەتسىز بولىپ كورىندى!
اتا- اناسى تۋرالى
اكەم مەنى قاتتى ەركەلەتەتىن. سول سەبەپتى مەن ءوزىمدى اكەمنىڭ قىزىمىن دەپ سانايتىنمىن. اپكەلەرىم اكەمنىڭ اكەلىك سەزىمدەرى مەن تۋعاندا عانا وياندى دەيدى. ءبىراق ماعان ولاي كورىنبەيدى. ول كەزدە مەن جاي كىشكەنتاي بولاتىنمىن. ول سول ءۇشىن مەنىمەن كوپ ۋاقىتىن وتكىزەتىن. مەن اكەم سەكىلدى اشىق، مەيىرىمدى جانمىن. ونىڭ قاتىگەز بولىپ كەتپەگەنىنە رازىمىن. ەل باسقارۋشىسى ءۇشىن بۇل وتە ماڭىزدى.
انامنان ماعان ۇيلەسىمدىكتى ىزدەۋگە قۇشتارلىق قاسيەتى بەرىلدى. مەن جاڭا الەمدى تانىپ- بىلۋگە قاشاندا ۇلكەن قىزىعۋشىلىق تانىتامىن. انام - ينتۋيتسياسى كەرەمەت دامىعان، نازىك جاندى ادام. نەگىزىنەن اكەم مەن انام ءبىر- ءبىرىنىڭ اينىماعان كەسكىنى دەسەم دە بولادى. ولار جارتى عاسىر بىرگە بولىپ كەلگەندىكتەن، ءبىر بۇتىنگە اينالدى. وزگەنىڭ قيىندىقتارىنا بەي- جاي قاراماۋ - ەكەۋىنە دە ءتان قاسيەت. بۇل قاسيەت ماعان دا، اپكەلەرىمە دە بەرىلدى.
اپكەلەرى تۋرالى
مەن تۋعاندا ولار اقىل توقتاتقان ۇلكەن قىزدار بولاتىن. سوندىقتان قىزعانىش دەگەن اتىمەن بولمادى. داريعا ول كەزدە ماسكەۋلىك ۋنيۆەرسيتەتكە ءتۇسىپ، تەك دەمالىستاردا كەلىپ وتىراتىن. بارلىق ۋاقىتىمدى دينارامەن بىرگە وتكىزەتىنمىن. مەن ونى قاتتى جاقسى كوردىم. ول مەكتەپكە كەتكەن سايىن تەرەزەگە جالتاقتاۋمەن بولاتىنمىن. مەن بارلىق ۋاقىتىمدى اپكەممەن بىرگە وتكىزگىم كەلەتىن. الايدا ول ەسەيگەندە، مەنىڭ قاسىنان شىققىم كەلمەيتىنى ونىڭ مازاسىن قاشىراتىن. اپكەم ارينە ءوز قاتارلاستارىمەن ۋاقىت وتكىزگەندى قالايتىن. مەن انامنان دينارانىڭ مەنى وزىمەن الىپ ءجۇرۋىن سۇراپ قويمايتىنمىن. اتا- انام ديناراعا سول ءۇشىن قىسىم كورسەتەتىن. اپكەمنىڭ وعان ىزاسى كەلەتىن.
ءبىر سوزبەن ايتقاندا اپكەلى- سىڭلىلەر اراسىندا بولاتىن قالىپتى تۇسىنىسپەۋشىلىكتەر. كەيىن داريعا ەكەۋى مەنى تاربيەلەۋگە كىرىسكەندە مەنىڭ ىزام كەلەتىن. قازىر وكىنىشكە قاراي بىزدەر ءار قالادا تۇرىپ، ءبىر- ءبىرىمىزدى سيرەك كورەمىز. ءبىراق مەن شالعايدان دا اپكەلەرىمنىڭ قامقورلىعىن سەزىنەمىن. ولار كەز- كەلگەن جاعدايدا قاسىمنان تابىلىپ، قول ۇشىن بەرۋگە ءازىر ەكەنىنە سەنىمدىمىن.
پرەزيدەنت اكەسى تۋرالى
اكەمىز پرەزيدەنتتىككە العاش ۇسىنىلعاندا مەن 11 جاستا ەدىم. مەن ول كەزدە بۇنىڭ قانشالىقتى ماڭىزدى ەكەنىن تۇسىنە قويماعان بولاتىنمىن. تەك ۇلكەن توي بولىپ، بىزگە كوپ حالىق جينالعانى ەسىمدە قالدى. جاز كەزى بولاتىن، اكەم جاپ- جاس، سىمباتتى، اقشىل سۇر كوستيۋمدە ەدى...
شەتەلدەگى وقۋى تۋرالى
12 جاسىمدا اكەم مەنى گەرمانياعا وقۋعا جىبەردى. مەن وتە ءۇيجاندى بالا بولاتىنمىن. مەنى اياق استى ءوز ورتامنان اجىراتىپ، وزگە ەلگە جىبەرۋى مەن ءۇشىن جازا سياقتى بولىپ كورىنەتىن. مەكتەپ بۇرىنعى موناستىردىڭ ورنىندا بولاتىن. كۇن سايىن تەلەفوننان جىلاپ، مەنى الىپ كەتۋىن سۇرايتىنمىن. جارتى جىلدان كەيىن اقىرى ەلىمە قايتتىم. بۇل دەربەس ومىرگە العاشقى قادامىم بولاتىن. نەمىس ءتىلىن تاماشا مەڭگەرىپ الدىم.
گەرمانيادان كەيىن شۆەيسارياعا جول تارتتىم. بىرگە وقىعان جەرلەستەرىم شەتەلدە جۇرگەنگە قۋانسا، مەنى تۋعان جەرىمە تارتىپ تۇراتىن. سوعان قاراماستان، شۆەيساريالىق مەكتەپتە 2 - جىل وقىپ، اعىلشىن ءتىلىن ۇيرەنىپ الدىم.
بيزنەس جايلى
مەنىڭ بيزنەستەگى العاشقى تاجىريبەم سۋ شىعاراتىن Vita زاۋىتىن ىسكە قوسۋ كەزىندە بولدى. مەن ول كەزدە ءوندىرىس ديرەكتورى ەدىم. ەتيكەتكاسىنان باستاپ، ءونىمدى ساتىلىمعا شىعارۋعا دەيىن باسى- قاسىندا ءجۇردىم.
مەن ءوزىمنىڭ سالامدى ۇزاق ىزدەدىم. «ەۆروپا+» راديوسىندا ديرەكتوردىڭ كومەكشىسى بولدىم. بانكتەردىڭ بىرىندەگى زاڭ دەپارتامەنتىندە ءىس- تاجىريبەدەن ءوتتىم. استانادا اكەمنىڭ حاتشىسى بولدىم. اقىرى بيزنەسكە بەت بۇردىم! باستى سەبەپ - اتا- انامنان تاۋەلسىز ءومىر سۇرگىم كەلدى. العاش بيزنەس جايلى 19 جاسىمدا ويلاندىم... بىرنەشە جىلدان سوڭ دامۋشى كومپانيامەن بىرلەسىپ، Luxor- دى سالا باستادىق. تەلەكوممۋنيكاتسيامەن دە شۇعىلداندىم. قازاقستاندا ساندىق بايلانىستى ورناتتىم. مۇنىمەن قوسا ينتەرنەت- قوسىمشالاردى تەحنيكالىق قامتاماسىز ەتۋمەن اينالىساتىن Nursat دەگەن كومپانيام بولدى.
كۇيەۋى تۋرالى
العاش كەزدەسكەنىمىزدە مەن وعان مۇلدەم ۇنامايمىن دەپ ويلاتىنمىن. ول مەنى ەركە حانشايىم كورىپ، تەسىلە قاراۋى ىزامدى كەلتىرەتىن. سىمباتى ماعان ۇناعانىمەن، ول تۋرالى جاقسى ويدا بولمادىم. ەكىنشى رەت كەزدەسكەندە ەكەۋىمىز جاقسى سويلەسىپ كەتتىك. ماعان ونىڭ ءوزىن ەركىن ۇستاعانى ۇنادى. تاربيەسى دە جاقسى. ديماش - وتە ءبىلىمدى ازامات. امەريكا مەن يتاليادا ءبىلىم العان. بىرنەشە شەت ءتىلىن مەڭگەرگەن. ماعان ونىڭ ءوز مانسابىن ەڭ تومەننەن، «قازمۇنايگازدا» جۇمىس ىستەۋدەن باستاپ، بىرتىندەپ كوتەرىلگەنى ۇنادى. دەپارتامەنت ديرەكتورىنا دەيىن ەشكىمنىڭ قولداۋىنسىز كوتەرىلدى. ءوزىمدى ونىمەن جايلى سەزىنەمىن. مەن ونىڭ ءداستۇردى ساقتاپ، ۇلكەندەر مەن ايەلدەرگە قۇرمەتپەن قارايتىنىن قاتتى باعالايمىن. ول بالالارعا دا ۇلكەن جىلىلىقپەن قارايدى!
كۇيەۋىنىڭ ۇسىنىس جاساۋى جايلى
بۇل وتە ادەمى بولدى! 8 - مامىردا ول مەنى رەستورانعا شاقىردى. مەن ونىڭ ويىندا نە بار ەكەنىن سەزىپ قويدىم. كەشكى استان كەيىن ول مەنى ەدەنى راۋشان جاپىراقتارىمەن كومكەرىلگەن جەكە زالعا اپاردى. رومانتيكالىق مۋزىكا ويناپ تۇردى. تەرەزەدەن تۇنگى الماتىنىڭ كەرەمەت كورىنىسى دە باۋراپ اكەتتى. مەن تۇك تۇسىنبەگەن ادامنىڭ كەيپىن تانىتتىم. ول بولسا ساۋساعىما ساقينا تاعىپ، وعان تۇرمىسقا شىعۋىمدى سۇرادى. مەن ونى تاعى ءبىر ساعاتتاي جاۋاپ قايتارماي قيناپ قويدىم. اقىرى شىداماي كەلىسىمىمدى بەردىم.
كۇيەۋىنىڭ اكەسىمەن العاش تانىسۋى تۋرالى
ەكەۋى گولفتەن پرەزيدەنتتىك كۋبوك كەزىندە تانىستى. ديماش بۇرىننان گولفپەن اۋەستەنەتىن. ءوزى سوندا بارماقشى ەدى. ءىس- شارا الدىنداعى كەشتە وعان بىرەۋ حابارلاسىپ، «وسىنداي جەرگە كەل... پرەزيدەنتپەن كەزدەسەسىڭ» دەگەن ەكەن. ول قاتتى الاڭدادى. الايدا كەزدەسۋ ءساتتى ءوتىپ، ۇيىنە باقىتتى ورالدى.
Nur.kz
